કોલકતા, નવી દિલ્હી, 6 નવેમ્બર (હિ.સ.): પશ્ચિમ બંગાળના નદિયા જિલ્લાના નવદ્વીપમાં બુધવારે મોડી રાત્રે કેન્દ્રીય શિક્ષણ રાજ્યમંત્રી અને ભૂતપૂર્વ રાજ્ય ભાજપ પ્રમુખ સુકાંત મજુમદારના કાફલા પર કથિત રીતે હુમલો કરવામાં આવ્યો હતો. મજુમદાર એક પાર્ટીના કાર્યક્રમમાં હાજરી આપીને પરત ફરી રહ્યા હતા.

ભાજપે આરોપ લગાવ્યો છે કે, નવદ્વીપમાં મુખ્ય બસ સ્ટેન્ડ પાસે ટીએમસી અને ભાજપ સમર્થકો વચ્ચે કાફલો અથડાયો હતો. આ દરમિયાન શાસક પક્ષના કેટલાક કાર્યકરોએ કાફલાના વાહન પર હુમલો કર્યો. મજુમદારનો દાવો છે કે, હુમલો સંપૂર્ણપણે ઉશ્કેરણી વગર કરવામાં આવ્યો હતો અને હુમલાખોરો નશાની હાલતમાં હતા. તેમણે એવો પણ આરોપ લગાવ્યો કે, ઘણા ભાજપના કાર્યકરોને ગંભીર રીતે માર મારવામાં આવ્યો હતો, કેટલાક ગંભીર રીતે ઘાયલ થયા હતા. ઘટના બાદ મંત્રીનો કાફલો સુરક્ષિત રીતે ભાગી ગયો હતો.

સ્થાનિક તૃણમૂલ કોંગ્રેસના નેતૃત્વએ તમામ આરોપોને નકારી કાઢ્યા છે. નવદ્વીપ નગરપાલિકાના અધ્યક્ષ બિમન સાહા કહે છે કે, જ્યારે ભાજપ સમર્થકોએ ટીએમસીની ટ્રેડ યુનિયન પાંખ, આઈએનટીટીયુસી ના સ્થાનિક કાર્યાલય પર હુમલો કર્યો ત્યારે તણાવ શરૂ થયો હતો. આના કારણે બસ સ્ટેન્ડ પાસે આઈએનટીટીયુસી સમર્થકો દ્વારા કરવામાં આવેલા વિરોધ પ્રદર્શન દરમિયાન બે જૂથો વચ્ચે ફરી એક અથડામણ થઈ.

નોંધનીય છે કે, તાજેતરના મહિનાઓમાં રાજ્યમાં ભાજપના નેતાઓના કાફલા પર હુમલાની ઘણી ઘટનાઓ નોંધાઈ છે. ગયા મહિને, માલદા જિલ્લાના ભાજપ સાંસદ ખગેન મુર્મુના વાહન પર જલપાઈગુડીમાં હુમલો કરવામાં આવ્યો હતો, જેમાં તેઓ ગંભીર રીતે ઘાયલ થયા હતા અને હજુ પણ સારવાર હેઠળ છે. તેવી જ રીતે, ઓક્ટોબરમાં, દાર્જિલિંગના ભાજપ સાંસદ રાજુ બિસ્તાના કાફલા પર સુકિયા પોખરી વિસ્તારમાં તૃણમૂલ સમર્થકો દ્વારા હુમલો કરવામાં આવ્યો હતો.

હિન્દુસ્થાન સમાચાર / ઓમ પરાશર / સંતોષ મધુપ / મુકુંદ

હિન્દુસ્થાન સમાચાર / ડો.હિતેશ એન.વ્યાસ