મથુરા (ઉત્તર પ્રદેશ), નવી દિલ્હી, 16 ડિસેમ્બર (હિ.સ.): મથુરા જિલ્લામાં દિલ્હી-આગ્રા યમુના એક્સપ્રેસ વે પર, આજે વહેલી સવારે સાત બસો અને ત્રણ કારમાં ભીષણ આગ લાગી, જેમાં મોટી જાનહાનિ થઈ. અગ્નિશામકોએ આગ પર કાબુ મેળવ્યો છે. જિલ્લા મેજિસ્ટ્રેટ, વરિષ્ઠ પોલીસ અધિક્ષક શ્લોક કુમાર અને અન્ય અધિકારીઓ ઘટનાસ્થળે છે. અધિકારીઓએ જણાવ્યું હતું કે, ગાઢ ધુમ્મસ વચ્ચે સાત બસો અને ત્રણ કાર અથડાઈ હતી, જેના કારણે વાહનોમાં આગ લાગી હતી. છ લોકોના મોતની પુષ્ટિ થઈ છે, અને 25 થી વધુ લોકો ઘાયલ થયા છે. એક્સપ્રેસ વેના અસરગ્રસ્ત ભાગ પર ટ્રાફિક અસ્થાયી રૂપે બંધ કરવામાં આવ્યો છે.

મથુરાના વરિષ્ઠ પોલીસ અધિક્ષક કુમારે જણાવ્યું હતું કે, સાત બસો અને ત્રણ કાર અથડાઈ હતી, જેના કારણે બધા વાહનોમાં આગ લાગી હતી. અકસ્માતને કારણે ઘટનાસ્થળે અંધાધૂંધી મચી ગઈ હતી. રાહત અને બચાવ કામગીરી લગભગ પૂર્ણ થઈ ગઈ છે. અત્યાર સુધીમાં છ લોકોના મોતની પુષ્ટિ થઈ છે, જ્યારે દાઝી ગયેલા 25 લોકોને હોસ્પિટલમાં દાખલ કરવામાં આવ્યા છે. બધાની હાલત સ્થિર હોવાનું જાણવા મળે છે. મૃતકોના મૃતદેહોને પોસ્ટમોર્ટમ માટે મોકલી દેવામાં આવ્યા છે.

મુખ્યમંત્રીએ અકસ્માતની નોંધ લેતા, મૃતકોના પરિવારજનોને બે લાખ રૂપિયાનું વળતર આપવાની જાહેરાત કરી છે. તેમણે ઘાયલોને યોગ્ય અને સારી સારવાર આપવાનો પણ નિર્દેશ આપ્યો છે. જિલ્લા મેજિસ્ટ્રેટે જણાવ્યું હતું કે, ઘાયલોની હોસ્પિટલમાં સારવાર ચાલી રહી છે.

હિન્દુસ્થાન સમાચાર / મુકુન્દ

હિન્દુસ્થાન સમાચાર / ડો.હિતેશ એન.વ્યાસ