નવી દિલ્હી, 14 માર્ચ (હિ.સ.). વિદેશ મંત્રાલયે ફરી એકવાર પાકિસ્તાનના પોતાના દેશમાં થઈ રહેલી આતંકવાદી પ્રવૃત્તિઓ માટે ભારતને દોષી ઠેરવવાના વલણની ટીકા કરી છે. ભારત કહે છે કે, પોતાની આંતરિક સમસ્યાઓ અને નિષ્ફળતાઓ માટે બીજા પર આંગળી ચીંધવાને બદલે, પાડોશી દેશે પોતાની અંદર જોવું જોઈએ.

વિદેશ મંત્રાલયના પ્રવક્તા રણધીર જયસ્વાલે શુક્રવારે એક નિવેદનમાં કહ્યું કે, અમે પાકિસ્તાન દ્વારા લગાવવામાં આવેલા પાયાવિહોણા આરોપોને સખત રીતે નકારી કાઢીએ છીએ. આખી દુનિયા જાણે છે કે વૈશ્વિક આતંકવાદનું કેન્દ્ર ક્યાં છે. પાકિસ્તાને પોતાની આંતરિક સમસ્યાઓ અને નિષ્ફળતાઓ માટે બીજા પર આંગળી ચીંધવા અને દોષારોપણ કરવાને બદલે પોતાની અંદર જોવું જોઈએ.

પાકિસ્તાનના વિદેશ મંત્રાલયના પ્રવક્તા શફકત અલી ખાને તાજેતરમાં ત્યાં ટ્રેન હાઇજેકિંગની ઘટના પર કહ્યું હતું કે, આતંકવાદીઓ અફઘાનિસ્તાનમાં બેઠેલા તેમના માસ્ટરના સંપર્કમાં છે. જ્યારે તેમને પૂછવામાં આવ્યું કે શું પાકિસ્તાને ભૂતકાળમાં બલૂચ લિબરેશન આર્મી (બીએલએ) ની પ્રવૃત્તિઓ માટે ભારતને દોષ આપવાની નીતિ બદલી છે. તો તેમણે કહ્યું કે, ભારત સામેના તેમના આરોપો હજુ પણ યથાવત છે. અમારી નીતિમાં કોઈ ફેરફાર થયો નથી. ભારત પાકિસ્તાન વિરુદ્ધ આતંકવાદને પ્રોત્સાહન આપવામાં સામેલ છે. તેઓ આ ખાસ ઘટનામાં ફક્ત એટલું જ કહેવા માંગે છે કે, આતંકવાદીઓ અફઘાનિસ્તાન સાથે સંપર્કમાં હોવાના પૂરતા પુરાવા અમારી પાસે છે.

હિન્દુસ્થાન સમાચાર / અનૂપ શર્મા / પવન કુમાર

હિન્દુસ્થાન સમાચાર / માધવી વ્યાસ