વોશિંગ્ટન, નવી દિલ્હી, 25 એપ્રિલ (હિ.સ.). યુક્રેન પરના તાજેતરના હુમલાઓ બાદ અમેરિકાએ રશિયાને કડક ચેતવણી આપી છે. રાષ્ટ્રપતિ ડોનાલ્ડ ટ્રમ્પે કડક વલણ અપનાવ્યું અને કહ્યું કે, જો યુક્રેન સાથે શાંતિ કરાર નહીં થાય તો રશિયા પર પ્રતિબંધોનો સામનો કરવો પડી શકે છે. જોકે, ટ્રમ્પે બાદમાં પત્રકારોને જણાવ્યું હતું કે તેમનું માનવું છે કે, રશિયા યુક્રેન પર હુમલા રોકવાની તેમની અપીલને ગંભીરતાથી લેશે. બંને દેશો વચ્ચે કરાર હજુ પણ શક્ય છે.

એબીસી ન્યૂઝ અનુસાર રાષ્ટ્રપતિ ટ્રમ્પે ગુરુવારે કહ્યું હતું કે, યુક્રેન પર હુમલા રોકવા માટે અમેરિકા રશિયા પર સતત દબાણ કરી રહ્યું છે. ટ્રમ્પે દાવો કર્યો હતો કે, તમને ખ્યાલ નથી કે અમે રશિયા પર કેટલું દબાણ મૂકી રહ્યા છીએ. ટ્રમ્પને પૂછવામાં આવ્યું હતું કે યુક્રેન સાથે શાંતિ યોજના સુધી પહોંચવા માટે રશિયન સરકારે કઈ છૂટછાટો આપી છે? તેમણે સ્પષ્ટ જવાબ આપ્યો ન હતો. ટ્રમ્પે કહ્યું કે, તેઓ ગુરુવારે ધ એટલાન્ટિક અખબારના મુખ્ય સંપાદક જેફરી ગોલ્ડબર્ગને મળવા જઈ રહ્યા છે, જેમને અજાણતામાં સિગ્નલ ચેટમાં સામેલ કરવામાં આવ્યા હતા. નોંધનીય છે કે, આ ચેટમાં સંરક્ષણ સચિવ પીટ હેગસેથ સહિત યુએસ સંરક્ષણ અધિકારીઓએ યમનમાં હુથી બળવાખોરો પર હુમલો કરવાની યોજનાઓની ચર્ચા કરી હતી.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ