નવી દિલ્હી, 21 જૂન (હિ.સ.). અમદાવાદ એર ઇન્ડિયા વિમાન દુર્ઘટના બાદ, નાગરિક ઉડ્ડયન મહાનિર્દેશાલય (ડીજીસીએ) એ ઉડ્ડયન સલામતી અંગે મોટી કાર્યવાહી કરી છે. ડીજીસીએ એ શનિવારે એરલાઇન કંપનીને ક્રૂ શેડ્યૂલિંગ, પાલન દેખરેખ અને આંતરિક જવાબદારીમાં પ્રણાલીગત નિષ્ફળતા બદલ એક વરિષ્ઠ ફ્લાઇટ ઓપરેશન અધિકારી સહિત ત્રણ વરિષ્ઠ અધિકારીઓને દૂર કરવાનો નિર્દેશ આપ્યો હતો.

સત્તાવાર સૂત્રોએ જણાવ્યું હતું કે, ડીજીસીએ એ એર ઇન્ડિયાને ક્રૂ શેડ્યૂલિંગ અને રોસ્ટરિંગ સંબંધિત તમામ ભૂમિકાઓ અને જવાબદારીઓમાંથી ત્રણ અધિકારીઓને દૂર કરવાનો આદેશ આપ્યો છે. 20 જૂનના રોજ જારી કરાયેલા આદેશમાં, ડીજીસીએ એ એર ઇન્ડિયાને આ અધિકારીઓ સામે તાત્કાલિક આંતરિક શિસ્તબદ્ધ કાર્યવાહી શરૂ કરવા પણ કહ્યું હતું. ડીજીસીએ દ્વારા જારી કરાયેલા આદેશ અનુસાર, આ ત્રણ અધિકારીઓમાં એરલાઇનના એક વિભાગીય વાઈસ પ્રેસીડેન્ટનો પણ સમાવેશ થાય છે.

અગાઉ ડીજીસીએ એ, એર ઇન્ડિયાને કટોકટી ઉપકરણોની તપાસ માટે નિર્ધારિત તારીખ પૂરી થવા છતાં ત્રણ એરબસ વિમાનો ઉડાન ભરી ત્યારે સલામતી નિયમોનું ઉલ્લંઘન કરવા બદલ ચેતવણી આપી હતી. ડીજીસીએ એ આ મુદ્દાને ઉકેલવામાં ધીમી ગતિએ કામ કરવા બદલ પણ ઠપકો આપ્યો હતો. આ મામલો મે મહિનામાં એર ઇન્ડિયા એરલાઇન્સના ત્રણ એરબસ વિમાનોની તપાસ સાથે સંબંધિત છે.

ઉલ્લેખનીય છે કે, 12 જૂનના રોજ લંડન જઈ રહેલું એર ઈન્ડિયાનું વિમાન એઆઈ-171 અમદાવાદના મેડિકલ કોલેજ કેમ્પસમાં ક્રેશ થયું હતું, જેમાં કુલ 242 મુસાફરો અને ક્રૂ સભ્યો હતા. આ વિમાન દુર્ઘટનામાં એર ઈન્ડિયાના વિમાનમાં સવાર એક વ્યક્તિ સિવાયના તમામ મુસાફરોના મોત થયા હતા અને જમીન પર રહેલા 29 અન્ય મુસાફરો પણ આ અકસ્માતમાં મૃત્યુ પામ્યા હતા.

હિન્દુસ્થાન સમાચાર / પ્રજેશ શંકર / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ