ઈસ્લામાબાદ, નવી દિલ્હી, 11 ઓગસ્ટ (હિ.સ.) પાકિસ્તાન અધિકૃત ગિલગિત માં પૂરથી નુકસાન પામેલા દાન્યુર નાલા અને રસ્તાના સમારકામ દરમિયાન ભૂસ્ખલનમાં આઠ લોકોના મોત થયા. રાહત અને બચાવ અધિકારીઓને ડર છે કે કાટમાળમાં વધુ કામદારો અને સ્વયંસેવકો ફસાયા છે.

ધ એક્સપ્રેસ ટ્રિબ્યુન અખબાર, એઆરવાય ન્યૂઝ ચેનલ અને જીઓ ચેનલના સમાચાર અનુસાર, પોલીસે સોમવારે જણાવ્યું હતું કે, સ્વયંસેવકો અને કામદારો રસ્તાનું સમારકામ કરી રહ્યા હતા. ત્યારબાદ આ લોકો ટેકરી પરથી ભૂસ્ખલનના કાટમાળમાં દટાયા. હોસ્પિટલના સૂત્રોએ પુષ્ટિ આપી છે કે, બધા મૃતકો સ્થાનિક સ્વયંસેવકો છે. બચાવ અધિકારીઓએ જણાવ્યું હતું કે, કાટમાળમાં દટાયેલા લોકોની શોધ ચાલુ છે.

સરકારી પ્રવક્તાએ જણાવ્યું હતું કે, હવામાન પરિવર્તનને કારણે, હિમનદીઓના ઝડપથી પીગળવાથી ઘણી નદીઓમાં પાણીનો પ્રવાહ વધ્યો છે. શિશપર ગ્લેશિયરમાં પાણીના પૂરથી ખેતીલાયક જમીનને નુકસાન થયું છે અને હુન્જા તરફ જતા કારાકોરમ હાઇવેનો એક ભાગ બંધ થઈ ગયો છે. નાગર રોડ પરથી ટ્રાફિક ડાયવર્ટ કરવામાં આવી રહ્યો છે. આનાથી પાકિસ્તાન અને ચીન વચ્ચે જમીન સંપર્ક તૂટી ગયો છે. દરમિયાન, અધિકારીઓએ આ વિસ્તારમાં વધુ વરસાદ અને ભૂસ્ખલનની ચેતવણી આપી છે. મુખ્યમંત્રી હાજી ગુલબર ખાને, તાત્કાલિક હાઇવે પુનઃસ્થાપિત કરવાનો નિર્દેશ આપ્યો છે.

અગાઉ, અધિકારીઓએ ડેરા ગાઝી ખાન, ઉત્તર-પૂર્વ અને ઉપલા પંજાબ, ઇસ્લામાબાદ-રાવલપિંડી, ઉત્તર-પૂર્વ બલુચિસ્તાન, ચિત્રાલ, સ્વાત, શાંગલા, મનશેહરા, મુર્રી, ગલિયત, કોહિસ્તાન, અબટાબાદ, બુનેર, સ્વાબી, નૌશેરા અને મર્દનમાં સ્થાનિક નદીઓ અને નાળાઓમાં પૂરની ચેતવણી આપી હતી. ખૈબર પખ્તુનખ્વાના પર્વતીય વિસ્તારોમાં ભૂસ્ખલનનો ભય યથાવત છે.

પોલીસે પુષ્ટિ આપી છે કે, બચાવ કામગીરી દરમિયાન ચાર લોકોને ગંભીર હાલતમાં કાટમાળમાંથી બહાર કાઢવામાં આવ્યા હતા. ગયા અઠવાડિયે, વડાપ્રધાન શાહબાઝ શરીફે, ગિલગિત-બાલ્ટિસ્તાનમાં તાજેતરના પૂરથી પ્રભાવિત પરિવારોને વળતરના ચેકનું વિતરણ કરતી વખતે 4 અબજ રૂપિયાના રાહત પેકેજની જાહેરાત કરી હતી.

હિન્દુસ્થાન સમાચાર / મુકુંદ / પવન કુમાર

હિન્દુસ્થાન સમાચાર / ડો.હિતેશ એન.વ્યાસ