નવી દિલ્હી, 06 સપ્ટેમ્બર (હિ.સ.) પ્રતિભાશાળી કમ્પાઉન્ડ તીરંદાજ ઋષભ યાદવના શાનદાર પ્રદર્શનના લીધે ભારતે શનિવારે દક્ષિણ કોરિયાના ગ્વાંગઝૂમાં યોજાઈ રહેલી વિશ્વ તીરંદાજી ચેમ્પિયનશિપના પ્રથમ જ દિવસે પુરૂષ અને મિશ્ર ટીમ સ્પર્ધાના ફાઇનલમાં પ્રવેશ મેળવી લીધો છે અને બે મેડલ પાક્કા કરી લીધા છે.

ઋષભે, જેણે ક્વોલિફિકેશન રાઉન્ડમાં 709 પોઇન્ટ મેળવીને આઠમું સ્થાન મેળવ્યું હતું, અમન સૈની અને પ્રથમેશ ફુગે સાથે મળીને બીજા ક્રમે રહેલી ભારતીય પુરૂષ ટીમને ઑસ્ટ્રેલિયાને 232-232 (શૂટ-ઑફ: 30-28), યુએસએને 234-233 અને તુર્કીને 234-232થી હરાવવામાં મદદ કરી અને હવે ખિતાબી મુકાબલામાં તેમનો સામનો ફ્રાન્સ સાથે થશે.

આ યુવા ખેલાડીએ અનુભવી વી. જ્યોતિ સુરેખા (707 પોઇન્ટ સાથે ત્રીજા ક્રમે રહેલી ટોચની ભારતીય કમ્પાઉન્ડ મહિલા) સાથે મળીને ચોથા ક્રમે રહેલી ભારતીય મિશ્ર ટીમને જર્મનીને 160-152, એલ સેલ્વાડોરને 157-153 અને ચાઇનીઝ તાઇપેઈને 157-155થી હરાવવામાં મદદ કરી અને હવે ફાઇનલ મુકાબલો નેધરલેન્ડ્સ સાથે થશે.

તેમ છતાં, જ્યોતિ, પરનીત કૌર અને પૃથિકા પ્રદીપની ગત ચેમ્પિયન ભારતીય ટીમ બીજા રાઉન્ડમાં ઇટાલી સામે 229-233થી હારી જતા બહાર થઈ ગઈ.

પરિણામ (કમ્પાઉન્ડ)

ક્વોલિફિકેશન

વ્યક્તિગત: પુરૂષ: ઋષભ યાદવ (આઠમા, 709), અમન સૈની (15મા, 707), પ્રથમેશ ફુગે (19મા, 706).

મહિલા: વી. જ્યોતિ સુરેખા (ત્રીજા, 707), પરનીત કૌર (11મા, 703), પૃથિકા પ્રદીપ (44મા, 690).

એલિમિનેશન

ટીમ: પુરૂષ: ભારતને બાય (પ્રથમ રાઉન્ડ) મળ્યો, ઑસ્ટ્રેલિયાને 232-232 પછી શૂટ-ઑફ: 30-28થી હરાવ્યો (બીજો રાઉન્ડ), અમેરિકાને 234-233થી હરાવ્યો (ક્વાર્ટર ફાઇનલ), તુર્કીને 234-232થી હરાવ્યો (સેમિફાઇનલ).

મહિલા: ભારતને બાય (પ્રથમ રાઉન્ડ) મળ્યો, ઇટાલી સામે 229-233થી હાર (બીજો રાઉન્ડ).

મિશ્ર: ભારતને બાય (પ્રથમ રાઉન્ડ), જર્મનીને 160-152 (બીજો રાઉન્ડ), એલ સેલ્વાડોરને 157-153 (ક્વાર્ટર ફાઇનલ) અને ચાઇનીઝ તાઇપેઈને 157-155 (સેમિફાઇનલ)થી હરાવ્યો.

હિન્દુસ્થાન સમાચાર / સુનીલ દુબે / વિરેન્દ્ર સિંહ

હિન્દુસ્થાન સમાચાર / અભિષેક બારડ