નવી દિલ્હી, 17 ઓક્ટોબર (હિ.સ.) દેશની સૌથી મોટી અને ખાનગી ક્ષેત્રની એચડીએફસી બેંકે, શનિવારે ચાલુ નાણાકીય વર્ષ 2026-27ના બીજા ક્વાર્ટર (જુલાઈ-સપ્ટેમ્બર)ના પરિણામોની જાહેરાત કરી છે. બેંકનો સપ્ટેમ્બર ક્વાર્ટરમાં એકીકૃત ચોખ્ખો નફો 5.55 ટકા વધીને 20,700 કરોડ રૂપિયા રહ્યો, જે ગયા નાણાકીય વર્ષના સમાન ગાળામાં 19,611 કરોડ રૂપિયા હતો.
એચડીએફસી બેંકે શેરબજારને આપેલી માહિતીમાં જણાવ્યું કે, જુલાઈ-સપ્ટેમ્બર ક્વાર્ટર દરમિયાન એકલ ધોરણે બેંકનો ચોખ્ખો નફો 4.7 ટકા ઉછળીને 19,510 કરોડ રૂપિયા નોંધાયો છે. જ્યારે, બેંકની કુલ આવક ગયા નાણાકીય વર્ષના બીજા ક્વાર્ટરના 91,040 કરોડ રૂપિયાથી વધીને જુલાઈ-સપ્ટેમ્બરમાં 97,258 કરોડ રૂપિયા થઈ છે, જ્યારે બેંકનો કુલ ખર્ચ 63,117 કરોડ રૂપિયાથી વધીને 67,774 કરોડ રૂપિયા પર પહોંચી ગયો છે.
બેંકે જણાવ્યું કે, જુલાઈ-સપ્ટેમ્બર ક્વાર્ટર દરમિયાન જોગવાઈઓ અને આકસ્મિકતાઓ માટે અલગ રાખવામાં આવેલી રકમ નજીવી વધીને 3,573.62 કરોડ રૂપિયા થઈ ગઈ, જે ગયા નાણાકીય વર્ષના આ જ ક્વાર્ટરમાં 3,500 કરોડ રૂપિયા હતી. બેંકે જણાવ્યું કે, ટ્રેઝરી પ્રદર્શનને બાદ કરતાં, કર પછીના નફા (પીએટી) માં વાર્ષિક ધોરણે 12.6 ટકાનો વધારો નોંધાયો છે.
એચડીએફસી બેંકે જણાવ્યું કે, ચાલુ નાણાકીય વર્ષ 2026-27ના બીજા ક્વાર્ટરમાં કુલ બિન-કાર્યકારી સંપત્તિ (જીએનપીએ) ગુણોત્તર સુધરીને 1.11 ટકા પર આવી ગયો, જે અગાઉના ક્વાર્ટરમાં 1.17 ટકા અને ગયા નાણાકીય વર્ષના સમાન ગાળામાં 1.24 ટકા હતો. બેંકનો કુલ મૂડી પર્યાપ્તતા ગુણોત્તર (સીએઆર) 30 સપ્ટેમ્બર, 2026 સુધીમાં 18.9 ટકા રહ્યો, જે એક વર્ષ પહેલા 20 ટકા હતો.
હિન્દુસ્થાન સમાચાર / પ્રજેશ શંકર / સંજીવ પાશ
હિન્દુસ્થાન સમાચાર / માધવી વ્યાસ
