
વોશિંગ્ટન (અમેરિકા), નવી દિલ્હી, 20 નવેમ્બર (હિ.સ.). વ્હાઇટ હાઉસે કર્સ્ટન એ. ડેવિસને, નવા રાષ્ટ્રીય સાયબર નિયામક નિયુક્ત કર્યા છે. તેમણે શોન કેર્નક્રોસનું સ્થાન લીધું. તાજેતરના દિવસોમાં અમેરિકાના હવાઈ વાહનવ્યવહાર, બેંકિંગ અને રાષ્ટ્રીય સુરક્ષા પ્રણાલીઓમાં મોટા પાયે આવેલી તકનીકી અડચણો બાદ વહીવટીતંત્રને ટીકાનો સામનો કરવો પડ્યો હતો. ત્યારબાદ પૂર્વ સાયબર પ્રમુખ શોન કેર્નક્રોસને પદ પરથી હટાવવામાં આવ્યા હતા.
કાયમી ધોરણે આ પદ પર નિમણૂક માટે સેનેટની મંજૂરી આવશ્યક હોય છે. આ કારણે ડેવિસ હાલમાં કાર્યકારી તરીકે ઓફિસ ઓફ ધ નેશનલ સાયબર ડિરેક્ટર (ઓએનસીડી) નું નેતૃત્વ કરશે. કર્સ્ટન ડેવિસ અમેરિકી સંરક્ષણ વિભાગ (પેન્ટાગોન) ના મુખ્ય માહિતી અધિકારી રહી ચૂક્યા છે. ખાનગી ક્ષેત્રમાં પણ તેમની પાસે સાયબર સુરક્ષાનો આશરે બે દાયકાનો અનુભવ છે. તેઓ સાયબર સુરક્ષા સાથે સંબંધિત વૈશ્વિક કંપનીઓ યુનિલીવર, એસ્ટી લોડર, બાર્કલેઝ અને સીમેન્સમાં ઉચ્ચ અધિકારી રહ્યા છે.
એક્સિઓસના અહેવાલમાં આ બાબતે વિગતવાર માહિતી આપવામાં આવી છે. અહેવાલ મુજબ, રાષ્ટ્રપતિ ડોનાલ્ડ ટ્રમ્પ પોતાની કૃત્રિમ બુદ્ધિમત્તા (એઆઈ) ટીમમાં ફેરફાર કરી રહ્યા છે. આ ક્રમમાં, ગુરુવારે વ્હાઇટ હાઉસે કર્સ્ટન એ. ડેવિસને નવા રાષ્ટ્રીય સાયબર નિયામક નિયુક્ત કર્યા. તેમની પાસે પોતાના પુરોગામી શોન કેર્નક્રોસની સરખામણીમાં આ ક્ષેત્રનો વધુ અનુભવ છે. વ્હાઇટ હાઉસના બે અધિકારીઓએ જણાવ્યું કે રાષ્ટ્રપતિ ટ્રમ્પના નવા ચીફ ઓફ સ્ટાફ સ્ટીફન મિલરે આ ફેરફારની જરૂરિયાત પર ભાર મૂક્યો હતો. ત્યારબાદ તેમણે કેર્નક્રોસને હટાવી દીધા.
ઓફિસ ઓફ ધ નેશનલ સાયબર ડિરેક્ટર સમગ્ર સંઘીય સરકારમાં સાયબર સુરક્ષા નીતિ અને વ્યૂહરચના વચ્ચે સંકલનનું કામ કરે છે. આ પદ માટે સેનેટની મંજૂરી જરૂરી છે. આ પહેલા સંરક્ષણ વિભાગના મુખ્ય માહિતી અધિકારી તરીકે ડેવિસને સેનેટ તરફથી મંજૂરી મળી ચૂકી છે. ડેવિસ પેન્ટાગોનમાં સંરક્ષણ સચિવ પીટ હેગસેથના મુખ્ય સલાહકાર રહી ચૂક્યા છે. તેઓ તેમને માહિતી વ્યવસ્થાપન, માહિતી ટેકનોલોજી અને સાયબર સુરક્ષા સાથે જોડાયેલા તમામ બાબતો પર સલાહ આપતા હતા. ડેવિસ ઇન્સ્ટિટ્યૂટ ફોર સાયબરના સ્થાપક છે. આ બિન-લાભકારી સંસ્થા છે અને ડિજિટલ દુનિયામાં નાગરિકોની સુરક્ષા માટે સમર્પિત છે.
---------------
હિન્દુસ્થાન સમાચાર / મુકુંદ
હિન્દુસ્થાન સમાચાર / ડો.હિતેશ એન.વ્યાસ