નવી દિલ્હી, 04 નવેમ્બર (હિં.સ.) હિન્દુસ્થાન સમાચારની દિલ્હી કાર્યાલયમાં બુધવારે રવીન્દ્ર કિશોર સિન્હા (આર.કે. સિન્હા)ની યાદમાં શ્રદ્ધાંજલિ સભાનું આયોજન કરવામાં આવ્યું હતું. પત્રકાર, ઉદ્યોગપતિ, રાજનીતિજ્ઞ અને સુરક્ષા એજન્સી એસઆઈએસ ના સ્થાપક આર.કે. સિન્હા હિન્દુસ્થાન સમાચાર ન્યૂઝ એજન્સીના અધ્યક્ષ રહ્યા હતા. તેમનું લાંબી બીમારી બાદ 30 ઓક્ટોબરના રોજ નિધન થયું હતું.

દિલ્હી સ્થિત હિન્દુસ્થાન સમાચારના પંચુઈંયા રોડ પર આવેલા કેન્દ્રીય કાર્યાલયમાં શ્રદ્ધાંજલિ સભાનું આયોજન કરવામાં આવ્યું હતું. આમાં ન્યૂઝ એજન્સીના સમૂહ સંપાદક રામબહાદુર રાય અને વરિષ્ઠ પત્રકાર અશોક ટંડન સહિત એજન્સીમાં વર્તમાન અને પૂર્વમાં કાર્યરત પત્રકારો સામેલ થયા. આ ઉપરાંત, દેશભરમાંથી એજન્સીમાં કાર્યરત સહયોગીઓ ગૂગલ મીટના માધ્યમથી જોડાયા. આ દરમિયાન, કેટલાક સાથીઓએ તેમની ઉદારતા અને કાર્યશૈલી તેમજ ન્યૂઝ એજન્સીમાં તેમના કાર્યકાળ સાથે જોડાયેલા પોતાના અનુભવો શેર કર્યા.

વરિષ્ઠ પત્રકાર રામબહાદુર રાયે તેમને એક મિત્ર તરીકે યાદ કર્યા અને જણાવ્યું કે, કેવી રીતે એક મુશ્કેલ સમયમાં તેમણે એજન્સીનો કાર્યભાર સંભાળ્યો અને તેને પત્રકારત્વના ક્ષેત્રમાં આગળ વધારવાનું કામ કર્યું. તેમણે વિશેષ રૂપે ઉદ્યોગપતિ અને રાજ્યસભા સાંસદ હોવા છતાં તેમની લેખન પ્રત્યેની રુચિનો ઉલ્લેખ કર્યો.

જ્યારે અશોક ટંડને પણ તેમને એક મિત્ર, પત્રકાર અને સ્વર્ગીય બાલેશ્વર અગ્રવાલ સાથે કામ કરવાના દિવસોના સાથી તરીકે યાદ કર્યા. તેમણે જણાવ્યું કે કેવી રીતે તેમની જ પ્રેરણાથી આર.કે. સિન્હા હિન્દુસ્થાન સમાચાર સાથે જોડાયા અને તેનો કાર્યભાર સંભાળ્યો.

હિન્દુસ્થાન સમાચારના સહયોગીઓએ, સ્વર્ગીય ડો. સિન્હાના ચિત્ર પર પુષ્પાંજલિ અર્પણ કરી અને બે મિનિટ મૌન પાળીને દિવંગત પુણ્યાત્માની શાંતિ માટે પ્રાર્થના કરી.

હિન્દુસ્થાન સમાચાર / અનૂપ શર્મા / પવન કુમાર / સચિન બુધૌલિયા

હિન્દુસ્થાન સમાચાર / માધવી વ્યાસ