ઢાકા, 17 ફેબ્રુઆરી (હિ.સ.) : મંગળવારે બાંગ્લાદેશ નેશનાલિસ્ટ પાર્ટી (BNP) ના પ્રમુખ તારિક રહેમાન દેશના આગામી વડાપ્રધાન તરીકે શપથ લેવાના છે ત્યારે બાંગ્લાદેશમાં એક નવો રાજકીય અધ્યાય લખાઈ રહ્યો છે. તેમની પાર્ટી, બીએનપી એ આ મહિનાની શરૂઆતમાં યોજાયેલી સામાન્ય ચૂંટણીઓમાં ઐતિહાસિક જીત મેળવી હતી.

તારિક રહેમાન આજે બાંગ્લાદેશના નવા વડાપ્રધાન તરીકે શપથ લેશે. રાષ્ટ્રપતિ મોહમ્મદ શહાબુદ્દીન રાષ્ટ્રીય સંસદના દક્ષિણ પ્લાઝામાં બપોરે 12 વાગ્યે નવા મંત્રીમંડળના સભ્યોને પદના શપથ લેવડાવશે.

રાષ્ટ્રીય સંસદ સચિવાલયને ટાંકીને, પ્રથમ આલોએ અહેવાલ આપ્યો છે કે નવા ચૂંટાયેલા સંસદ સભ્યો અને બંધારણીય સુધારણા પરિષદનો શપથ સમારોહ રાષ્ટ્રીય સંસદ ભવનના શપથ ગ્રહણ ખંડમાં સવારે 10:00 વાગ્યે શરૂ થશે. મંત્રીમંડળનો શપથ સમારોહ સાંજે 4:00 વાગ્યે થશે.

અગાઉ, બાંગ્લાદેશની વચગાળાની સરકારના મુખ્ય સલાહકાર, મોહમ્મદ યુનુસે રાજીનામું આપતા પહેલા તેમના વિદાય ભાષણમાં ભારત વિરુદ્ધ ઝેર ઓક્યું હતું. ભારતનું નામ લીધા વિના, તેમણે ઉત્તરપૂર્વ ભારતના સાત રાજ્યોને સેવન સિસ્ટર્સ તરીકે ઓળખાવ્યા હતા.

ઉલ્લેખનીય છે કે આ 5 ઓગસ્ટ, 2024 ના વિદ્યાર્થી-લોક આંદોલન પછી ચૂંટાયેલી સરકારની ઔપચારિક સ્થાપના દર્શાવે છે. આ પહેલા, બાંગ્લાદેશની 13મી સામાન્ય ચૂંટણીમાં બીએનપી એ પ્રચંડ વિજય મેળવ્યો હતો, દેશની 297 બેઠકોમાંથી 209 બેઠકો જીતી હતી, જ્યારે જમાત-એ-ઇસ્લામીએ 68 બેઠકો મેળવી હતી. ત્રણ દાયકાથી વધુ સમયથી ભૂતપૂર્વ વડા પ્રધાન શેખ હસીના અને સ્વર્ગસ્થ ભૂતપૂર્વ વડા પ્રધાન ખાલિદા ઝિયાની આસપાસ ફરતા બાંગ્લાદેશમાં 35 વર્ષ પછી તારિક રહેમાનના રૂપમાં નવા વડા પ્રધાન બનવાની તૈયારી છે. લોકસભાના અધ્યક્ષ ઓમ બિરલા રહેમાનના શપથ ગ્રહણ સમારોહમાં ભારતનું પ્રતિનિધિત્વ કરશે.

હિન્દુસ્થાન સમાચાર/સંજીવ પાશ

હિન્દુસ્થાન સમાચાર / હર્ષ શાહ