તેહરાન, નવી દિલ્હી, 13 માર્ચ (હિ.સ.): ભારત અને ઈરાનના વિદેશ પ્રધાનોએ ટેલિફોન પર વાતચીત કરી, જેમાં અમેરિકા અને ઈઝરાયલ સાથે વધતા તણાવ બાદ પ્રાદેશિક અને આંતરરાષ્ટ્રીય પરિસ્થિતિ પર ચર્ચા થઈ.

વિદેશ પ્રધાન ડૉ. એસ. જયશંકરે, શુક્રવારે તેમને આ બાબતે માહિતી આપી. તેમણે કહ્યું કે, ગુરુવારે રાત્રે ઈરાનના વિદેશ પ્રધાન સૈયદ અબ્બાસ અરાઘચી સાથે બીજી વાતચીત થઈ. દ્વિપક્ષીય બાબતો તેમજ બ્રિક્સ સંબંધિત મુદ્દાઓ પર ચર્ચા કરવામાં આવી.

ઈરાનના વિદેશ મંત્રાલયે એક નિવેદનમાં જણાવ્યું હતું કે, વિદેશ પ્રધાન અરાઘચીએ તેમના ભારતીય સમકક્ષ જયશંકરને ઈરાન વિરુદ્ધ અમેરિકા અને ઈઝરાયલ દ્વારા લેવામાં આવેલા કથિત આક્રમક પગલાં અને પ્રાદેશિક અને વૈશ્વિક સ્થિરતા પર તેમની અસર વિશે માહિતી આપી હતી.

અરાઘચીએ કહ્યું કે, ઈરાની સરકાર, લોકો અને સશસ્ત્ર દળો હુમલાઓ સામે સ્વ-બચાવના તેમના કાયદેસરના અધિકારનો ઉપયોગ કરવા માટે કટિબદ્ધ છે. તેમણે પ્રાદેશિક અને આંતરરાષ્ટ્રીય સંસ્થાઓ દ્વારા ઈરાન સામે લશ્કરી આક્રમણની નિંદા કરવાની જરૂરિયાત પર પણ ભાર મૂક્યો.

ઈરાનના વિદેશ મંત્રીએ બહુપક્ષીય સહયોગ માટે બ્રિક્સના મહત્વ પર પ્રકાશ પાડ્યો અને કહ્યું કે, વર્તમાન પરિસ્થિતિઓમાં, આ ફોરમ પ્રાદેશિક અને વૈશ્વિક સ્થિરતા અને સુરક્ષાને ટેકો આપવા માટે રચનાત્મક ભૂમિકા ભજવશે.

ઉલ્લેખનીય છે કે, પશ્ચિમ એશિયામાં લશ્કરી સંઘર્ષ પછી ડૉ. જયશંકર અને અરાઘચી વચ્ચે આ ચોથી વાતચીત છે. પશ્ચિમ એશિયામાં કટોકટી વચ્ચે હોર્મુઝ સ્ટ્રેટ દ્વારા વેપારી જહાજોની અવરજવર પ્રભાવિત થઈ છે. છેલ્લી વાતચીતમાં વિદેશ મંત્રી જયશંકરે, તેમના ઈરાની સમકક્ષ સાથે વેપારી શિપિંગ સલામતી અને ઊર્જા સુરક્ષાનો મુદ્દો ઉઠાવ્યો હતો.

હિન્દુસ્થાન સમાચાર / અનૂપ શર્મા / પવન કુમાર

હિન્દુસ્થાન સમાચાર / માધવી વ્યાસ