નવી દિલ્હી, 14 માર્ચ (હિ.સ.). લોકસભામાં વિરોધ પક્ષના નેતા રાહુલ ગાંધીએ કેન્દ્ર સરકાર પર લઘુત્તમ ટેકાના ભાવ (એમએસપી) અંગે ખેડૂતોને આપેલા વચનને પૂર્ણ કરવામાં નિષ્ફળ જવાનો આરોપ લગાવ્યો છે. તેમણે જણાવ્યું હતું કે, ખેડૂતોને 2021 માં સી2+50 ટકાના આધારે કાયદેસર એમએસપી આપવાનું વચન આપવામાં આવ્યું હતું, પરંતુ તેનો અમલ હજુ સુધી કરવામાં આવ્યો નથી.

શનિવારે સોશિયલ મીડિયા પર લોકસભામાં પૂછવામાં આવેલા એક પ્રશ્નને શેર કરતા રાહુલ ગાંધીએ સરકારને પૂછ્યું કે, શું સરકારે 2021 માં વિરોધ કરી રહેલા ખેડૂતોને વચન આપ્યું હતું કે, તમામ પાક માટે કાયદેસર રીતે ગેરંટીકૃત લઘુત્તમ ટેકાના ભાવ લાગુ કરવામાં આવશે. તેમણે પ્રશ્ન કર્યો કે શું આ કરવામાં આવ્યું હતું અને પૂછ્યું કે સરકાર તેનો અમલ કરવામાં કેમ નિષ્ફળ રહી. તેમણે એ પણ પૂછ્યું કે, શું સરકારે ચોક્કસ કઠોળ અને તેલીબિયાં, દેશમાં ઉત્પાદન ખાધનો સામનો કરી રહેલા પાકોની સીધી ખરીદી પર વિચાર કર્યો હતો અને જો એમ હોય તો, વિગતો શું હતી.

રાહુલ ગાંધીએ, સરકાર પર આ પ્રશ્નોના સ્પષ્ટ જવાબો ટાળવાનો અને ખેડૂતોને આપેલા વચનો પૂરા કરવામાં નિષ્ફળ રહેવાનો આરોપ લગાવ્યો. તેમણે કહ્યું કે, કોંગ્રેસ ખેડૂતોના અધિકારો અને લઘુત્તમ ટેકાના ભાવ (એમએસપી) પ્રણાલીના રક્ષણ માટે સંસદની અંદર અને બહાર પોતાનો અવાજ ઉઠાવતી રહેશે.

હિન્દુસ્થાન સમાચાર / પ્રશાંત શેખર / અમરેશ દ્વિવેદી

હિન્દુસ્થાન સમાચાર / ડો.હિતેશ એન.વ્યાસ