જૂનાગઢ, 15 માર્ચ (હિ.સ.) રાજ્ય સરકારના શ્રમ કૌશલ્ય વિકાસ અને રોજગાર વિભાગ હસ્તકના ગુજરાત મકાન અને અન્ય બાંધકામ શ્રમયોગી કલ્યાણ બોર્ડ દ્વારા જૂનાગઢ જિલ્લાના બાંધકામ શ્રમિકો માટે કલ્યાણકારી પગલું ભરતા વધુ ૪ ધન્વંતરી આરોગ્ય રથનું લોકાર્પણ કરવામાં આવ્યું છે.

મેંદરડા તાલુકાના દાત્રાણા ગામ ખાતેથી જિલ્લા પંચાયતના પ્રમુખ શ્રી હરેશભાઈ ઠુંમરે આ રથને લીલીઝંડી આપી પ્રસ્થાન કરાવ્યું હતું. તંદુરસ્ત શ્રમિક પરિવાર, તંદુરસ્ત સમાજ અને તંદુરસ્ત રાષ્ટ્રના સૂત્રને સાર્થક કરવાના હેતુથી કાર્યરત આ યોજના હેઠળ હવે બાંધકામ સાઈટ, કડિયાનાકા અને શ્રમિક વસાહતો પર જઈને શ્રમિકોને સ્થળ પર જ પ્રાથમિક આરોગ્ય સુવિધાઓ ઉપલબ્ધ કરાવવામાં આવશે. જિલ્લા પંચાયત પ્રમુખશ્રીએ નવીન ધન્વંતરી આરોગ્ય રથમાં ઉપલબ્ધ દવાઓ અને તબીબી સાધનોનું નિરીક્ષણ કર્યું હતું.

આ રથ દ્વારા જિલ્લાના દરેક બાંધકામ શ્રમિકને આરોગ્યપ્રદ સેવાઓ મળે તે માટે નક્કર આયોજન કરવામાં આવ્યું છે. અગાઉ જૂનાગઢ જિલ્લામાં જિલ્લા સ્તરે ૧ અને કેશોદ તથા વિસાવદર ખાતે ૧-૧ મળી કુલ ૩ રથ કાર્યરત હતા. હવે મેંદરડા, માણાવદર, માંગરોળ અને જૂનાગઢ શહેર માટે ફાળવવામાં આવેલા નવા ૪ રથ સાથે જિલ્લામાં કુલ ૭ ધન્વંતરી આરોગ્ય રથ કાર્યરત થયા છે, જે સમગ્ર જિલ્લાને આવરી લેશે.

વધુમાં, શ્રમિકો સરકારની શિક્ષણ, સહાય, પ્રસુતિ સહાય, આકસ્મિક મૃત્યુ સહાય, શ્રમિક અન્નપૂર્ણા યોજના અને ગો-ગ્રીન યોજનાની માહિતી મેળવી શકે તે માટે હેલ્પલાઇન નંબર ૧૫૫૩૭૨ કાર્યરત પણ છે. તેના થકી શ્રમિકો જરૂરી માહિતી અને માર્ગદર્શન મેળવી શકે છે.

આ સેવાથી શ્રમિકોને હોસ્પિટલ સુધી લાંબા થવાને બદલે તેમના કાર્યસ્થળે જ નિદાન અને સારવાર મળી રહેશે. આ લોકાર્પણ કાર્યક્રમમાં ઈ.એમ.આર.આઈ. ગ્રીન હેલ્થ સર્વિસના પ્રોગ્રામ મેનેજર શ્રી સમીરભાઈ રાવલ, પ્રોજેક્ટ કો-ઓર્ડીનેટર જયેન્દ્ર સોલંકી, બાંધકામ શ્રમયોગી કલ્યાણ બોર્ડના જિલ્લા નિરીક્ષક એમ.ડી. કક્કડ, જિલ્લા પ્રોજેક્ટ મેનેજર પી.એમ. ગોહિલ સહિતના અધિકારીઓ અને કર્મચારીઓ ઉપસ્થિત રહ્યા હતા.

---------------

હિન્દુસ્થાન સમાચાર / ભરતસિંહ જાદવ