તેહરાન, નવી દિલ્હી, 09 માર્ચ (હિ.સ.). 28 ફેબ્રુઆરીના રોજ ઈરાનમાં અમેરિકા-ઈઝરાયલી હુમલામાં માર્યા ગયેલા ઈરાનના ઇસ્લામિક ક્રાંતિના નેતા અને સર્વોચ્ચ નેતા સ્વર્ગસ્થ આયાતુલ્લાહ અલી ખામેનેઇના પુત્ર, મોજતબાને તેમના ઉત્તરાધિકારી તરીકે પસંદ કરવામાં આવ્યા છે. મોજતબા ઇસ્લામિક ક્રાંતિના નેતા અને દેશના સર્વોચ્ચ નેતા રહેશે. 88 સભ્યોની એક્સપર્ટ્સ એસેમ્બલી (મજલિસ-એ-ખોબેરેંગાન-એ-રહરી) એ મોજતબાને દેશના સર્વોચ્ચ નેતા તરીકે ચૂંટ્યા. ઈરાનની સૌથી શક્તિશાળી ધાર્મિક સંસ્થા તરીકે પણ ઓળખાતી એક્સપર્ટ્સ એસેમ્બલીએ, આજે સવારે આ માહિતીની પુષ્ટિ કરી. એજન્સીના અહેવાલ મુજબ, ઈરાનની એક્સપર્ટ્સ એસેમ્બલીએ આયતુલ્લાહ મોજતબા ખામેનેઇને ઇસ્લામિક ક્રાંતિના નવા નેતા તરીકે ચૂંટ્યા. એસેમ્બલીએ જણાવ્યું હતું કે, મોજતબાના પિતા, આયતુલ્લાહ સૈયદ અલી ખામેનેઇએ 1989માં ઇમામ ખોમેનેઇના મૃત્યુ પછી 37 વર્ષ સુધી ઈરાનનું નેતૃત્વ કર્યું હતું. તેમની શહાદત બાદ, એસેમ્બલીએ મોજતબા ખામેનેઇને તેમના ઉત્તરાધિકારી તરીકે ચૂંટ્યા.

રવિવારે મોડી રાત્રે જારી કરાયેલા એક નિવેદનમાં, એસેમ્બલીએ 28 ફેબ્રુઆરીના હુમલામાં ઇમામ ખામેનેઇ અને અન્ય લોકોની શહાદત પર શોક વ્યક્ત કર્યો હતો અને ઈરાન પર યુએસ-ઇઝરાયલી હુમલાની નિંદા કરી હતી. નિવેદનમાં કહેવામાં આવ્યું હતું કે, ઇમામ ખામેનેઇની શહાદત પછી તરત જ અને યુદ્ધની પરિસ્થિતિ અને દુશ્મનો તરફથી સીધી ધમકીઓ હોવા છતાં, એસેમ્બલીએ તેની બંધારણીય જવાબદારી નિભાવવામાં કોઈ સમય બગાડ્યો નહીં અને નવા નેતાની પસંદગી કરવાની પ્રક્રિયા શરૂ કરી. રવિવારે મળેલી એસેમ્બલીએ ભારે મતથી ઇસ્લામિક ક્રાંતિના ત્રીજા નેતા તરીકે મોજતબા ખામેનેઇને ચૂંટ્યા.

ઈરાન ઇન્ટરનેશનલના અહેવાલ મુજબ, ઈરાનના રાજ્ય ટીવીએ સોમવારે સવારે જાહેરાત કરી હતી કે, મોજતબા ખામેનેઇને તેમના પિતાના ઉત્તરાધિકારી તરીકે ચૂંટવામાં આવ્યા છે. આ નિર્ણય ત્યારે આવ્યો છે, જ્યારે આયાતુલ્લા અલી ખામેનેઇની હત્યા પછી ફાટી નીકળેલા યુદ્ધમાં નાટકીય વળાંક આવ્યો છે. મોજતબા ખામેનેઇને લાંબા સમયથી આ પદ માટે સંભવિત દાવેદાર માનવામાં આવે છે. નોંધનીય છે કે, મોજતબાએ અગાઉ ક્યારેય ચૂંટણી લડી નથી કે, તેમને કોઈ સરકારી પદ પર નિયુક્ત કરવામાં આવ્યા નથી.

સ્ટેટ ટીવીએ એક નિવેદન પ્રસારિત કર્યું જેમાં કહેવામાં આવ્યું હતું કે, મોજતબાને મજબૂત સમર્થનના આધારે ચૂંટવામાં આવ્યા હતા. તેમાં દેશવાસીઓને તેમની પાછળ એક થવા અપીલ કરવામાં આવી હતી. સમગ્ર તેહરાનમાં જાહેર સ્થળોએ લોકો ઉજવણી કરી રહ્યા હોય તેવા દ્રશ્યો પણ દર્શાવવામાં આવ્યા હતા. લગભગ અડધી સદી પહેલા ઇસ્લામિક ક્રાંતિ પછી સુપ્રીમ લીડરના પદ પર સત્તાનું આ હસ્તાંતરણ મહત્વપૂર્ણ માનવામાં આવે છે. મોજતબા હવે સેના અને શક્તિશાળી અર્ધલશ્કરી સંગઠન, રિવોલ્યુશનરી ગાર્ડ્સના સુપ્રીમ કમાન્ડર પણ રહેશે.

મોજતબા ખામેનેઇને યુનાઇટેડ સ્ટેટ્સ તરફથી વિરોધનો સામનો કરવો પડશે. અમેરિકી પ્રમુખ ડોનાલ્ડ ટ્રમ્પે જણાવ્યું છે કે, ખામેનેઇના પુત્ર તેમના માટે અસ્વીકાર્ય છે. ઈરાનના રિવોલ્યુશનરી ગાર્ડે એક નિવેદન બહાર પાડીને મોજતબા ખામેનેઇને ટેકો જાહેર કર્યો. ઈરાન સમર્થિત લેબનીઝ સંગઠન હિઝબુલ્લાહે ટેલિગ્રામ પર તેમનો ફોટો શેર કર્યો, તેમને ઇસ્લામિક ક્રાંતિના નેતા ગણાવ્યા.

ઈરાનના રાષ્ટ્રપતિ મસૂદ પેઝેશ્કિયાને નવા સુપ્રીમ લીડર તરીકે ચૂંટાયા બદલ, મોજતબા ખામેનેઇને અભિનંદન આપ્યા. તેમણે કહ્યું કે, આ નિમણૂક દેશ માટે શક્તિ અને સન્માનના નવા યુગની શરૂઆત દર્શાવે છે. પેઝેશ્કિયાને કહ્યું કે, આ પસંદગી રાષ્ટ્રની એકતાને મજબૂત બનાવશે અને ઈરાનને તેના દુશ્મનોના કાવતરાનો સામનો કરવામાં મદદ કરશે.

હિન્દુસ્થાન સમાચાર / મુકુંદ

હિન્દુસ્થાન સમાચાર / માધવી વ્યાસ