સુરત, 12 એપ્રિલ (હિ.સ.): સુરત શહેરમાં સથવારા કડીયા સમસ્ત પંચ અને વિશ્વકર્મા પ્રગતિ યુવા મંડળના સંયુક્ત ઉપક્રમે ચામુંડા માતાજીની શોભાયાત્રા, નવચંડી યજ્ઞ અને મહાપ્રસાદનો ધાર્મિક મહોત્સવ ભવ્ય રીતે શરૂ થયો છે. આ કાર્યક્રમ 12 એપ્રિલ, 2026ના રોજ સૈયદપુરા સ્થિત વિશ્વકર્મા ભવનમાં આયોજિત થયો, જ્યાં વહેલી સવારથી જ ભક્તોનો ઉત્સાહ જોવા મળ્યો.

યજ્ઞવિધિનો આરંભ સવારે 8 વાગ્યે કરવામાં આવ્યો હતો. કાર્યક્રમ અનુસાર સાંજે 5 વાગ્યે શ્રીફળ હોમ અને ત્યારબાદ 6 વાગ્યે પૂર્ણાહુતિ યોજાશે. રાત્રે 8 વાગ્યે મહાપ્રસાદનું વિતરણ કરવામાં આવશે. આ યજ્ઞમાં લગભગ 25 દંપતિઓ ભાગ લઇ પૂજન-અર્ચન કરશે, જે આ આયોજનને વિશેષ બનાવે છે.

આયોજકો છેલ્લા છ વર્ષથી સતત આ ધાર્મિક કાર્યક્રમનું આયોજન કરી રહ્યા છે. યજ્ઞનો મુખ્ય ઉદ્દેશ સમાજમાં ધાર્મિક મૂલ્યો પ્રત્યે જાગૃતિ લાવવાનો, નવી પેઢીમાં સંસ્કારોનું સંવર્ધન કરવાનો અને સમુદાયમાં એકતા મજબૂત બનાવવાનો છે. સમગ્ર સમાજને આ પવિત્ર પ્રસંગે જોડાવા માટે આમંત્રણ આપવામાં આવ્યું છે.

---------------

હિન્દુસ્થાન સમાચાર / યજુવેન્દ્ર દુબે