નવી દિલ્હી, 27 મે (હિ.સ.). 3 દિવસના સત્તાવાર પ્રવાસે કેનેડા ગયેલા કેન્દ્રીય વાણિજ્ય અને ઉદ્યોગ મંત્રી પીયૂષ ગોયલે બુધવારે ત્યાં અગ્રણી પેન્શન ફંડ, સોવરિન અને સંસ્થાકીય રોકાણકારો સાથે બેઠકો યોજી હતી. ગોયલે આ બેઠકોમાં રોકાણકારોને ભારત સાથે સ્વચ્છ ઊર્જા, ટેકનોલોજી, કૃત્રિમ બુદ્ધિમત્તા (એઆઈ), ડિજિટલ માળખું અને ઉત્પાદન જેવા ક્ષેત્રોમાં ભાગીદારીનું આમંત્રણ આપ્યું હતું.

બેઠકમાં ગોયલે ટકાઉ વિકાસ અને સહિયારી સમૃદ્ધિને પ્રોત્સાહન આપવા માટે નાણાકીય બજારોમાં સહયોગને વધુ ગાઢ બનાવવાની તકો શોધવા માટે પણ આહ્વાન કર્યું હતું. ગોયલે જણાવ્યું હતું કે, ખાસ કરીને સનલાઇફ ફાઇનાન્શિયલના વડા કેવિન સ્ટ્રેન સાથે યોજાયેલી બેઠકમાં વીમા, નિવૃત્તિ સોલ્યુશન્સ, હેલ્થ ફાઇનાન્સિંગ અને ભારતના ઝડપથી વિકસતા નાણાકીય સેવા ક્ષેત્રમાં લાંબા ગાળાના રોકાણની તકો પર ચર્ચા કરવામાં આવી હતી.

અનેક અગ્રણી બિઝનેસ દિગ્ગજો સાથેની દ્વિપક્ષીય બેઠકોમાં ફેરફેક્સ ફાઇનાન્શિયલ હોલ્ડિંગ્સના વી. પ્રેમ વત્સ, મેન્યુલાઇફ ફાઇનાન્શિયલ કોર્પોરેશનના પ્રમુખ અને મુખ્ય કાર્યકારી અધિકારી (સીઈઓ) ફિલિપ વિધરિંગ્ટન, સનલાઇફ કેનેડાના પ્રમુખ અને સીઈઓ કેવિન સ્ટ્રેન, ટોરોન્ટો ડોમિનિયન બેંક ગ્રુપના પ્રમુખ અને સીઈઓ રેમન્ડ ચૂન, નિયો પરફોર્મન્સ મટિરિયલ્સના પ્રમુખ અને સીઈઓ રહીમ સુલેમાન અને મેકકેન ફૂડ્સના પ્રમુખ અને સીઈઓ મેક્સ કોઇયુન સામેલ હતા.

હિન્દુસ્થાન સમાચાર / પ્રજેશ શંકર / સુનીત નિગમ

હિન્દુસ્થાન સમાચાર / ડો.હિતેશ એન.વ્યાસ