અયોધ્યા, નવી દિલ્હી, 26 જૂન (હિ.સ.): અયોધ્યામાં શ્રી રામ જન્મભૂમિ મંદિર માટે દાનમાં કથિત ઉચાપતની તપાસ ચાલી રહી છે, ત્યારે શ્રી રામ જન્મભૂમિ તીર્થ ક્ષેત્ર ટ્રસ્ટના મહામંત્રી ચંપત રાય અને ટ્રસ્ટના સભ્ય અનિલ મિશ્રાએ શુક્રવારે પોતાના પદ પરથી રાજીનામું આપ્યું છે. શ્રી રામ મંદિર નિર્માણ સમિતિના અધ્યક્ષ નૃપેન્દ્ર મિશ્રએ તેમના રાજીનામાની પુષ્ટિ કરતા કહ્યું કે, તપાસમાં નિષ્પક્ષતા અને પારદર્શિતા સુનિશ્ચિત કરવા માટે આ નિર્ણય લેવામાં આવ્યો છે.

અહેવાલો અનુસાર, ચંપત રાય અને અનિલ મિશ્રાએ ટ્રસ્ટના અધ્યક્ષ મહંત નૃત્ય ગોપાલ દાસને રાજીનામા સુપરત કર્યા છે. દાનમાં કથિત અનિયમિતતાની તપાસ કરતી સ્પેશિયલ ઇન્વેસ્ટિગેશન ટીમ (એસઆઈટી) એ તેની તપાસને વધુ તીવ્ર બનાવી દીધી છે ત્યારે આ રાજીનામા આપવામાં આવ્યા છે.

એસઆઈટી ના પ્રારંભિક તપાસ અહેવાલના આધારે, ગુરુવારે આ કેસમાં આઠ લોકો સામે પ્રથમ માહિતી અહેવાલ (એફઆઈઆર) દાખલ કરવામાં આવ્યો હતો. ત્યારબાદ તમામ આરોપીઓને કસ્ટડીમાં લેવામાં આવ્યા હતા. તપાસ વેગ પકડી રહી છે, અને ટ્રસ્ટના બંને અધિકારીઓના રાજીનામાને એક મહત્વપૂર્ણ ઘટના માનવામાં આવી રહી છે.

ઉલ્લેખનીય છે કે, શ્રી રામ જન્મભૂમિ મંદિરમાં પ્રસાદ સંબંધિત કથિત ગેરરીતિઓ અને ચોરીની ફરિયાદો મળ્યા બાદ, રાજ્ય સરકારે મુખ્યમંત્રી યોગી આદિત્યનાથના નિર્દેશ પર, ઉચ્ચ સ્તરીય તપાસ કરવા માટે એક વિશેષ તપાસ ટીમ (એસઆઈટી) ની રચના કરી હતી. એસઆઈટી એ તેનો પ્રારંભિક અહેવાલ સરકારને સુપરત કર્યો છે, જેના આધારે આ કેસમાં આગળની કાર્યવાહી શરૂ કરવામાં આવી છે.

એસઆઈટી હાલમાં સમગ્ર મામલાની વિગતવાર તપાસ કરી રહી છે. તપાસ એજન્સી સાથે સંકળાયેલા અધિકારીઓનું કહેવું છે કે, તમામ પાસાઓની સંપૂર્ણ તપાસ કરવામાં આવી રહી છે અને તપાસ પૂર્ણ થયા પછી તથ્યોના આધારે આગળની કાર્યવાહી કરવામાં આવશે.

હિન્દુસ્થાન સમાચાર / શિવ સિંહ / ઉદય કુમાર સિંહ

હિન્દુસ્થાન સમાચાર / ડો.હિતેશ એન.વ્યાસ