ગુરુગ્રામ, નવી દિલ્હી, 12 જુલાઈ (હિ.સ.) ભારતીય-અમેરિકન પંજાબી ગાયિકા જસ્મીન સૅન્ડલસે પોતાના ‘ધ ડ્રીમ ગર્લ ઇન્ડિયા ટૂર’ દરમિયાન લાઇવ કોન્સર્ટમાં સગાઈની જાહેરાત કરીને પ્રશંસકોને ચોંકાવી દીધા. તેમણે મંચ પરથી પોતાના મંગેતર શેખર ચૌધરીને બોલાવ્યા અને પોતાની સગાઈની અંગૂઠી બતાવીને જાહેરમાં સંબંધની પુષ્ટિ કરી.

કોન્સર્ટ દરમિયાન જસ્મીને કહ્યું, “આ છે મારા ચૌધરી સાહેબ. એમણે જ મને આ આંગળીમાં રિંગ પહેરાવી છે.” ત્યારબાદ શેખર ચૌધરી મંચ પર પહોંચ્યા, જ્યાં બંનેનું દર્શકોએ તાળીઓ અને સીટી વગાડીને સ્વાગત કર્યું. જસ્મીને પોતાની સગાઈની અંગૂઠી બતાવી અને શેખરને ગળે લગાવ્યા.

ત્યારબાદ બંનેએ જસ્મીનના લોકપ્રિય ગીત ‘લાવાં’ પર રોમેન્ટિક અંદાજમાં પ્રસ્તુતિ આપી. આ અવસરે જસ્મીન ગોલ્ડન રંગના ભારે કઢાઈવાળા લહેંગા અને પરંપરાગત આભૂષણોમાં જોવા મળી.

કોન્સર્ટમાં તેમણે ‘પંજેબા’, ‘સિપ સિપ’, ‘શરારત’, ‘ધુરંધર’, ‘ઇલિગલ વેપન’ અને ‘યાર ના મળે’ સહિત પોતાના અનેક લોકપ્રિય ગીતો રજૂ કર્યા. ‘ધ ડ્રીમ ગર્લ ઇન્ડિયા ટૂર’ હેઠળ તેમના આગામી કાર્યક્રમો મુંબઈ, બેંગલુરુ અને ચંડીગઢમાં પણ યોજાશે.

સગાઈની જાહેરાત બાદ પ્રશંસકોમાં શેખર ચૌધરીને લઈને ઉત્સુકતા વધી ગઈ છે. જોકે, તેમના વ્યવસાય અને પૃષ્ઠભૂમિ અંગે હજી સુધી કોઈ સત્તાવાર માહિતી સામે આવી નથી.

ઉલ્લેખનીય છે કે, જસ્મીન સૅન્ડલસ અગાઉ પંજાબી ગાયક ગેરી સંધૂ સાથેના પોતાના સંબંધોને લઈને પણ ચર્ચામાં રહી ચૂકી છે. જલંધરમાં જન્મેલી અને અમેરિકાના કેલિફોર્નિયામાં ઉછરેલી જસ્મીને, ‘મુસ્કાન’થી પોતાના સંગીત કારકિર્દીની શરૂઆત કરી હતી. તેમણે ફિલ્મ ‘કિક’ના ગીત ‘યાર ના મળે’થી બોલિવૂડ પાર્શ્વગાયનમાં ઓળખ બનાવી અને તેમને શ્રેષ્ઠ મહિલા પાર્શ્વગાયિકા નો પુરસ્કાર પણ મળી ચૂક્યો છે.

હિન્દુસ્થાન સમાચાર / ઈશ્વર / સત્યવાન

હિન્દુસ્થાન સમાચાર / માધવી વ્યાસ