નવી દિલ્હી, 17 ઓગસ્ટ (હિ.સ.). ભારતીય ઓલિમ્પિક સંઘ (આઈઓએ) એ, બેલ્જિયમ અને નેધરલેન્ડ્સમાં 15 થી 30 ઓગસ્ટ સુધી યોજાઈ રહેલા એફઆઈએચ હોકી વિશ્વ કપ-2026માં ભારતીય પુરુષ અને મહિલા ટીમોની ભાગીદારીનું સ્વાગત કર્યું છે. આઈઓએએ બંને ટીમોને વિશ્વ કપ માટે ક્વોલિફાય કરવા અને આંતરરાષ્ટ્રીય મંચ પર ભારતનું પ્રતિનિધિત્વ કરવા બદલ અભિનંદન પાઠવ્યા.

આઈઓએએ સોમવારે એક સત્તાવાર નિવેદન જારી કરીને જણાવ્યું કે, પુરુષ અને મહિલા બંને વર્ગોમાં ભારતની હાજરી ભારતીય હોકીની મજબૂતી અને સતત થઈ રહેલી પ્રગતિ દર્શાવે છે. ભારત આ વર્ષે એફઆઈએચ હોકી વિશ્વ કપમાં પુરુષ અને મહિલા બંને ટીમો સાથે ભાગ લેનારો એકમાત્ર દક્ષિણ એશિયાઈ દેશ છે.

વિશ્વ કપ બંને ટીમોને દુનિયાની ટોચની ટીમો સામે રમવા અને તેમના ઉચ્ચ પ્રદર્શનવાળા રમત કાર્યક્રમને મજબૂત કરવાનો મહત્વપૂર્ણ અવસર પૂરો પાડી રહ્યો છે. આ પછી ભારતીય ટીમોનું લક્ષ્ય આઈચી-નાગોયા 2026 એશિયન ગેમ્સ અને પછી લોસ એન્જલસ 2028 ઓલિમ્પિક ગેમ્સની તૈયારીઓ પર રહેશે.

ભારતીય ઓલિમ્પિક સંઘના અધ્યક્ષ ડો. પીટી ઉષાએ કહ્યું, “હું એફઆઈએચ હોકી વિશ્વ કપ માટે ક્વોલિફાય કરનારી અમારી પુરુષ અને મહિલા બંને ટીમોને હાર્દિક અભિનંદન પાઠવું છું. હું ટુર્નામેન્ટ માટે અમારા ખેલાડીઓ, કોચો અને સમગ્ર સહયોગી સ્ટાફને શુભેચ્છાઓ પાઠવું છું.”

તેમણે કહ્યું, “દુનિયાની સર્વશ્રેષ્ઠ ટીમો સામે આ સ્તરની ટુર્નામેન્ટમાં સ્પર્ધા કરવી કોઈપણ ખેલાડીની ઉચ્ચ પ્રદર્શનવાળી યાત્રાનો મહત્વપૂર્ણ ભાગ છે. અહીંથી પ્રાપ્ત થનારો અનુભવ આઈચી-નાગોયા 2026 એશિયન ગેમ્સ અને અંતે લોસ એન્જલસ 2028 ઓલિમ્પિક ગેમ્સની તૈયારીમાં અત્યંત ઉપયોગી થશે.”

પીટી ઉષાએ કહ્યું, “એશિયન ગેમ્સ અમારી હોકી ટીમો માટે મોટા બહુ-રમતગમત આયોજનમાં પોતાને ચકાસવા અને ઓલિમ્પિક મહત્વાકાંક્ષાઓની દિશામાં આગળ વધવાનો મહત્વપૂર્ણ અવસર હશે. અમને બંને ટીમો પર પૂરો ભરોસો છે અને મને વિશ્વાસ છે કે અમારા ખેલાડીઓ ગર્વ, દ્રઢ સંકલ્પ અને ઉત્કૃષ્ટતા સાથે ભારતનું પ્રતિનિધિત્વ કરશે, જે હંમેશા ભારતીય હોકીની ઓળખ રહી છે.”

હોકી ઇન્ડિયાના અધ્યક્ષ ડો. દિલીપ તિર્કીએ કહ્યું, “એફઆઈએચ હોકી વિશ્વ કપમાં અમારી પુરુષ અને મહિલા બંને ટીમોની ભાગીદારી અમારા ખેલાડીઓ, કોચો અને સહયોગી ટીમોની સખત મહેનત, અનુશાસન અને મહત્વાકાંક્ષાનો પુરાવો છે.”

તેમણે કહ્યું, “અમારી તૈયારીઓ અત્યંત સાવચેતીપૂર્વક કરવામાં આવી છે અને બંને ટીમો મજબૂત વ્યૂહાત્મક દૃષ્ટિકોણ તથા દુનિયાની સર્વશ્રેષ્ઠ ટીમો સામે સ્પર્ધા કરવાના દ્રઢ સંકલ્પ સાથે ટુર્નામેન્ટમાં ઉતરી રહી છે. વિશ્વ કપ હંમેશા એક કઠિન પડકાર હોય છે, પરંતુ આ અમારા ખેલાડીઓ માટે ઉચ્ચતમ સ્તર પર પોતાને ચકાસવાનો મહત્વપૂર્ણ અવસર પણ છે.”

તિર્કીએ કહ્યું, “આઈચી-નાગોયા 2026 એશિયન ગેમ્સ પણ નજીક છે, તેથી અમારી તૈયારી અને સ્પર્ધાત્મક યાત્રાની દ્રષ્ટિએ આ ટુર્નામેન્ટનું મહત્વ વધુ વધી જાય છે. અમને બંને ટીમોની ક્ષમતા પર ભરોસો છે અને અમને ખબર છે કે અમારા ખેલાડીઓ મેદાન પર પોતાનું સર્વશ્રેષ્ઠ પ્રદર્શન કરશે અને દેશને ગૌરવાન્વિત કરશે.”

આઈઓએ અને હોકી ઇન્ડિયાએ દેશના કરોડો હોકી ચાહકો સાથે મળીને વિશ્વ કપમાં ભાગ લઈ રહેલી ભારતીય પુરુષ અને મહિલા ટીમોને પોતાનો પૂરો ટેકો અને શુભેચ્છાઓ પાઠવી છે.

આઈઓએએ કહ્યું કે, વિશ્વ કપમાં યુરોપમાં મળનારો ઉચ્ચ સ્તરીય સ્પર્ધાત્મક અનુભવ ભારતીય ટીમોની આઈચી-નાગોયા 2026 એશિયન ગેમ્સની તૈયારીઓમાં મહત્વપૂર્ણ યોગદાન આપશે અને લોસ એન્જલસ-2028 ઓલિમ્પિક માટે દીર્ઘકાલીન ઉચ્ચ પ્રદર્શન યાત્રાનો ભાગ બનશે.

હિન્દુસ્થાન સમાચાર / સુનીલ દુબે / સુનીત નિગમ

હિન્દુસ્થાન સમાચાર / માધવી વ્યાસ