મુંબઈ, નવી દિલ્હી, 14 સપ્ટેમ્બર (હિ.સ.). કેન્દ્રીય ગૃહ મંત્રાલયના રાજભાષા વિભાગે એન્ફોર્સમેન્ટ ડિરેક્ટોરેટ (ઈડી) ની હિન્દી ગૃહ પત્રિકા ‘પ્રવર્તન સંદેશ’ને વર્ષ 2025-26 માટે પ્રતિષ્ઠિત ‘રાજભાષા કીર્તિ પુરસ્કાર’ ('ક' ક્ષેત્રમાં દ્વિતીય પુરસ્કાર) થી સન્માનિત કર્યું છે.

મુંબઈમાં આયોજિત 'હિન્દી દિવસ-2026' અને છઠ્ઠા અખિલ ભારતીય રાજભાષા સંમેલન દરમિયાન કેન્દ્રીય ગૃહ રાજ્યમંત્રી બી. સંજય કુમાર અને નિત્યાનંદ રાયે આ પુરસ્કાર પ્રદાન કર્યો. આ કાર્યક્રમ કેન્દ્રીય ગૃહ અને સહકાર મંત્રી અમિત શાહની અધ્યક્ષતામાં સંપન્ન થયો.

ઈડી અનુસાર, પ્રવર્તન સંદેશ એ એજન્સીનું આંતરિક હિન્દી સામયિક છે, જેના દ્વારા ડિરેક્ટોરેટના કાર્યક્ષેત્ર સાથે સંકળાયેલા જટિલ કાયદાકીય, નાણાકીય અને તપાસ સંબંધિત તકનીકી વિષયોની સાથે-સાથે રાજભાષા હિન્દી સંબંધિત ગતિવિધિઓને સરળ, સહજ અને પ્રભાવી ભાષામાં રજૂ કરવામાં આવે છે. સામયિકનો મુખ્ય ઉદ્દેશ્ય ડિરેક્ટોરેટના બહુઆયામી કાર્યોને હિન્દીમાં સામાન્ય જનતા અને અધિકારીઓ સમક્ષ લાવવાની સાથે-સાથે સરકારી કામકાજમાં રાજભાષાના પ્રગતિશીલ ઉપયોગને સશક્ત બનાવવાનો છે.

વર્ષ 2025-26 દરમિયાન પ્રકાશિત સામયિકના 9મા અંકનો મુખ્ય વિષય ‘આતંકવાદના ભંડોળ સામે ઈડીની ઝુંબેશ’ હતો. આમાં આતંકવાદના ભંડોળ સામે એજન્સીની કાર્યવાહીઓ, નાણાકીય અપરાધો અને દેશની આર્થિક તેમજ રાષ્ટ્રીય સુરક્ષા સાથે સંકળાયેલા સંવેદનશીલ પાસાઓને વિસ્તૃત રીતે રજૂ કરવામાં આવ્યા હતા. અંક-10નો કેન્દ્રીય વિષય ‘લોકહિતથી દેશહિત સુધી: ઈડીની પીડિત-કેન્દ્રિત કાર્યવાહીઓ અને રાહત’ રાખવામાં આવ્યો હતો. આમાં નાણાકીય છેતરપિંડીના પીડિતોને રાહત અપાવવા, અપરાધની આવક શોધી કાઢવા, જપ્તી કરવા અને સંપત્તિઓની અંતિમ વાપસી સુનિશ્ચિત કરવાની ઈડીની ન્યાયકેન્દ્રિત કાર્યશૈલીને પ્રમુખતાથી રેખાંકિત કરવામાં આવી.

ઉલ્લેખનીય છે કે, ઈડીએ રાજભાષા હિન્દીને પોતાની સંસ્થાકીય કાર્ય-સંસ્કૃતિનો અભિન્ન અંગ બનાવવા માટે સતત નવીન પ્રયાસો કર્યા છે. આ પહેલા વર્ષ 2024માં પણ ડિરેક્ટોરેટે ગૃહ મંત્રાલય દ્વારા કૃત્રિમ બુદ્ધિમત્તા (એઆઈ) વિષય પર આયોજિત અખિલ ભારતીય હિન્દી લઘુ ફિલ્મ નિર્માણ પ્રતિયોગિતામાં તૃતીય પુરસ્કાર મેળવ્યો હતો.

હિન્દુસ્થાન સમાચાર / પ્રશાંત શેખર / પવન કુમાર

હિન્દુસ્થાન સમાચાર / માધવી વ્યાસ