વોશિંગ્ટન, નવી દિલ્હી, 16 સપ્ટેમ્બર (હિ.સ.). અમેરિકી સેન્ટ્રલ કમાન્ડ (સેન્ટકોમ) એ, ગયા અઠવાડિયે જર્મનીમાં એક બેઠક દરમિયાન આઠ દેશોના વરિષ્ઠ સૈન્ય અધિકારીઓની યજમાની કરી. એક અમેરિકી અધિકારીએ મંગળવારે અનાદોલુને જણાવ્યું કે, બેઠકનો મુખ્ય ઉદ્દેશ્ય મધ્ય પૂર્વમાં સુરક્ષા સહયોગ વધારવાની તકો પર ચર્ચા કરવાનો હતો.

અધિકારીએ નામ ન આપવાની શરતે માહિતી આપતા જણાવ્યું કે, બેઠકમાં પ્રાદેશિક સુરક્ષા સહયોગને મજબૂત કરવાના સંભવિત માર્ગો પર વિચાર કરવામાં આવ્યો. જોકે, તેમણે તેમાં સામેલ દેશો અને ચર્ચા કરાયેલા વિશિષ્ટ મુદ્દાઓની માહિતી આપવાનો ઇનકાર કર્યો.

તુર્કિયેની સરકારી સમાચાર એજન્સી અનાદોલુ અનુસાર, અમેરિકી સમાચાર આઉટલેટ એક્સિયોસે બે ઇઝરાયેલી અધિકારીઓને ટાંકીને દાવો કર્યો કે બેઠકમાં ઇઝરાયેલ, સાઉદી અરેબિયા, સંયુક્ત આરબ અમીરાત (યુએઈ), બહેરીન, કુવૈત, કતાર, જોર્ડન અને ઇજિપ્તના સૈન્ય પ્રમુખો સામેલ થયા હતા. જોકે, અમેરિકી અધિકારીએ આ દેશોની ભાગીદારીની સ્વતંત્ર રીતે પુષ્ટિ કરી નથી.

એક્સિયોસના રિપોર્ટ અનુસાર, સેન્ટકોમના પ્રમુખ જનરલ બ્રેડ કૂપરે બેઠકમાં હાજર અધિકારીઓને જણાવ્યું કે, ઈરાની હુમલાઓ છતાં અમેરિકી સેના મધ્ય પૂર્વમાંથી પોતાની સૈન્ય હાજરી ઓછી નહીં કરે.

રિપોર્ટમાં એ પણ કહેવામાં આવ્યું છે કે, કૂપરે સહભાગીઓને હોર્મુઝ જળસંધિમાંથી જહાજોની અવરજવર વધારવાની અમેરિકી યોજનાઓની જાણકારી આપી. આ જળમાર્ગ વૈશ્વિક ઊર્જા પુરવઠા માટે વ્યૂહાત્મક રીતે અત્યંત મહત્વપૂર્ણ માનવામાં આવે છે.

આ બેઠક એવા સમયે થઈ છે, જ્યારે હોર્મુઝ જળસંધિને લઈને ઈરાન અને અમેરિકા વચ્ચે તણાવ વધેલો છે. જૂનમાં બંને પક્ષો વચ્ચે એક કરાર સંબંધિત મેમોરેન્ડમ પર હસ્તાક્ષર થવાની વાત સામે આવી હતી, જેમાં આ વ્યૂહાત્મક જળમાર્ગને ફરીથી ખોલવાની યોજનાનો ઉલ્લેખ હતો.

આ દરમિયાન ક્ષેત્રમાં હૂથી દળોની ગતિવિધિઓ પણ વધવાના સમાચાર સામે આવ્યા. રિપોર્ટ્સ અનુસાર, સાઉદી અરેબિયા પર હુમલા તેજ થયા અને બાબ અલ-મંદેબ જળસંધિને લઈને પણ સુરક્ષા ચિંતાઓ વધી.

ફેબ્રુઆરીમાં અમેરિકા અને ઇઝરાયેલે ઈરાન વિરુદ્ધ મોટા પાયે સૈન્ય અભિયાન ચલાવ્યું હતું. હુમલાઓમાં સરકારી ઇમારતો, સૈન્ય ઠેકાણાઓ, મિસાઈલ માળખા અને એર ડિફેન્સ સિસ્ટમને નિશાન બનાવવામાં આવ્યા હોવાની જાણકારી સામે આવી હતી.

તેના જવાબમાં ઈરાને ઇઝરાયેલ અને ક્ષેત્રમાં હાજર અમેરિકી સૈન્ય ઠેકાણાઓ પર મિસાઈલ તથા ડ્રોન હુમલા કર્યા. ત્યારબાદ સંઘર્ષની અસર મધ્ય પૂર્વના અન્ય ભાગોમાં પણ જોવા મળી.

આ પૃષ્ઠભૂમિમાં જર્મનીમાં યોજાયેલી સેન્ટકોમની બેઠકને પ્રાદેશિક સૈન્ય સહયોગ અને સુરક્ષા સંકલનની દ્રષ્ટિએ મહત્વપૂર્ણ માનવામાં આવી રહી છે. જોકે, બેઠકમાં સામેલ તમામ દેશો અને વિસ્તૃત એજન્ડાની સત્તાવાર પુષ્ટિ હજુ સુધી થઈ નથી.

હિન્દુસ્થાન સમાચાર / અમરેશ દ્વિવેદી

હિન્દુસ્થાન સમાચાર / માધવી વ્યાસ