નવી દિલ્હી, 20 સપ્ટેમ્બર (હિ.સ.) સંગીત નાટક અકાદમીના ઉપ સચિવ સુમન કુમારે અહીં જણાવ્યું કે હિન્દી યુવા નાટ્યકારોની સંખ્યામાં સતત વૃદ્ધિ થઈ રહી છે, જે આનંદની વાત છે. કુમારે આ વાત શનિવારે દિલ્હી સ્થિત શ્રી રામ સેન્ટર સામે, સંજના બુક્સના સ્ટોલ ‘સાહિત્ય કે પેડ’ પર આયોજિત વરિષ્ઠ રંગકર્મી અને નાટ્યકાર આલોક શુક્લાના ચોથા નાટ્ય સંગ્રહ ‘પતઝડ કે ફૂલ ઔર દેખોના’ પુસ્તકના લોકાર્પણ પ્રસંગે કહી.

પુસ્તકનું લોકાર્પણ વરિષ્ઠ નાટ્યકાર પ્રતાપ સહગલ, નાટ્યકાર અને સમીક્ષક રાજેશ કુમાર, સંગીત નાટક અકાદમીના ઉપ સચિવ સુમન કુમાર, રંગ નિર્દેશક પ્રદીપ બાજપેયી, વરિષ્ઠ લેખિકા શશિ સહગલ, અભિનેતા શ્રીકાંત વર્મા, નાટ્યકાર અનિલ ઠાકુર તથા સંજના બુક્સના નિર્દેશક સંજના તિવારીએ સંયુક્ત રીતે કર્યું.

સુમન કુમારે હિન્દીમાં નવા નાટકો ન લખાવાની સામાન્ય ધારણાને નકારી કાઢતા કહ્યું કે, આલોક શુક્લા જેવા રચનાકારો નિરંતર સક્રિય છે અને રંગકર્મીઓએ આ સમકાલીન નાટકોને મંચ પર લાવવા જોઈએ.

વરિષ્ઠ નાટ્યકાર પ્રતાપ સહગલે આલોક શુક્લાના રચનાકાર્યની પ્રશંસા કરતા કહ્યું કે, ગંભીર બીમારી સામે ઝઝૂમવા છતાં તેમનું નિરંતર લેખન અને રંગ-નિર્દેશનમાં સક્રિય રહેવું પ્રેરણાદાયી છે. તેમણે બંને પૂર્ણકાલિક નાટકોના પ્રકાશન બદલ લેખકને અભિનંદન પાઠવ્યા.

નાટ્યકાર અને સમીક્ષક રાજેશ કુમારે ‘પતઝડ કે ફૂલ’ની રચનાની પ્રશંસા કરતા કહ્યું કે, તેમાં વડીલોની મનોસ્થિતિને કેન્દ્રમાં રાખીને બે અલગ-અલગ અંત આપવામાં આવ્યા છે, જે નિર્દેશકને પોતાની દ્રષ્ટિ અનુસાર મંચનની સ્વતંત્રતા આપે છે. જ્યારે બીજા નાટક ‘દેખોના’ પર ચર્ચા કરતા તેમણે કહ્યું કે જે રીતે સામાજિક પરિવેશને સમજવા માટે આજે મોહન રાકેશના નાટકોને વાંચવામાં આવે છે, તે જ રીતે આવનારા 10-15 વર્ષો પછી કોરોના કાળના સામાજિક યથાર્થને સમજવા માટે આલોક શુક્લાનું ‘દેખોના’ એક મહત્વપૂર્ણ નાટ્ય દસ્તાવેજ તરીકે વાંચવામાં અને મંચિત કરવામાં આવશે.

આ પ્રસંગે રંગ નિર્દેશક પ્રદીપ બાજપેયી, અભિનેતા શ્રીકાંત વર્મા, વિપિન કુમાર, શશિ સહગલ અને અનિલ ઠાકુર, નાટ્યકાર આલોક શુક્લા, અભિમન્યુ સિંહ ચૌધરી, શિખા મલ્હોત્રા અને હિંમત સિંહ નેગી સહિત મોટી સંખ્યામાં સાહિત્ય અને રંગજગત સાથે જોડાયેલા લોકો ઉપસ્થિત રહ્યા.

હિન્દુસ્થાન સમાચાર / શ્રદ્ધા દ્વિવેદી / મુકુંદ

હિન્દુસ્થાન સમાચાર / માધવી વ્યાસ