કચ્છ, 21 સપ્ટેમ્બર (હિ.સ.) : કચ્છના ગાંધીધામમાં બાંધકામ ક્ષેત્ર માટે મહત્વપૂર્ણ ઔદ્યોગિક વિકાસને વેગ મળ્યો છે. વૈશ્વિક કન્સ્ટ્રક્શન ઇક્વિપમેન્ટ ઉત્પાદક કંપની SDLG India દ્વારા ગાંધીધામમાં નવા મેન્યુફેક્ચરિંગ પ્લાન્ટનું ઉદ્ઘાટન કરવામાં આવ્યું છે. કંપનીએ આ પ્લાન્ટ માટે શરૂઆતના તબક્કામાં અંદાજે ₹300 કરોડનું રોકાણ કર્યું છે. તબક્કાવાર ઉત્પાદન ક્ષમતા વધારીને વાર્ષિક 3,000 જેટલા બાંધકામ સાધનોનું ઉત્પાદન કરવાનો કંપનીનો લક્ષ્યાંક છે.
નવા પ્લાન્ટ મારફતે SDLG India ભારતમાં પોતાના સ્થાનિક ઉત્પાદનને વધુ મજબૂત બનાવવાની દિશામાં આગળ વધી રહી છે. અહીં વ્હીલ લોડર, એક્સકેવેટર, મોટર ગ્રેડર સહિત બાંધકામ ક્ષેત્રમાં ઉપયોગી વિવિધ પ્રકારનાં મશીનોનું ઉત્પાદન કરવામાં આવશે. ઉત્પાદનને સ્થાનિક સ્તરે વધારવાની સાથે કંપની ભારતમાં સ્થાનિક કાચા માલ અને ઘટકોની ખરીદીમાં પણ વધારો કરવાની યોજના ધરાવે છે.
SDLG India દ્વારા ભારતમાં પોતાના પ્રોડક્ટ પોર્ટફોલિયોમાં પણ નોંધપાત્ર વિસ્તરણ કરવામાં આવ્યું છે. કંપનીએ ડીઝલ તથા ઇલેક્ટ્રિક એક્સકેવેટર, વ્હીલ લોડર અને મોટર ગ્રેડર સહિત કુલ 10 નવા બાંધકામ સાધનો રજૂ કર્યા છે. નવા સાધનોમાં હાઇડ્રોલિક સિસ્ટમ, ઓપરેટર કંટ્રોલ અને સલામતી સુવિધાઓમાં સુધારા સાથે ઇલેક્ટ્રિક મશીનોનો પણ સમાવેશ થાય છે.
કંપનીના જણાવ્યા મુજબ, ભારતના ઇન્ફ્રાસ્ટ્રક્ચર, રોડ નિર્માણ, માઇનિંગ, રેલવે, બંદરો અને અન્ય વિકાસલક્ષી પ્રોજેક્ટ્સમાં બાંધકામ સાધનોની માંગ સતત વધી રહી છે. આ વધતી માંગને ધ્યાનમાં રાખીને સ્થાનિક ઉત્પાદન આધાર કંપનીને ભારતીય ગ્રાહકો સુધી વધુ અસરકારક રીતે પહોંચવામાં મદદરૂપ થશે.
SDLG India 2009થી ભારતીય બજારમાં કાર્યરત છે અને છેલ્લા 17 વર્ષ દરમિયાન બાંધકામ તથા માઇનિંગ ક્ષેત્ર માટે વિવિધ મશીનો ઉપલબ્ધ કરાવ્યા છે. કંપની હવે સ્થાનિક સપ્લાયર નેટવર્કને વિસ્તૃત કરીને ભારતીય વેન્ડર ભાગીદારો સાથે મળીને લોકલાઇઝેશનનું પ્રમાણ વધારવા પર ભાર મૂકી રહી છે.
ગાંધીધામ પ્લાન્ટ અને ડીલર નેટવર્કના વિસ્તરણથી ભારતમાં અંદાજે 2,500 જેટલી પરોક્ષ રોજગારીની તકો ઊભી થવાની અપેક્ષા વ્યક્ત કરવામાં આવી છે. SDLG Indiaના જણાવ્યા મુજબ, ગુજરાતમાં આ રોકાણ કંપનીની ભારતમાં લાંબા ગાળાની ઉત્પાદન, સપ્લાય ચેઇન અને ગ્રાહક સેવા ક્ષમતાને વધુ મજબૂત બનાવશે.
---------------
હિન્દુસ્થાન સમાચાર / Rohit Ramjibhai Padhiyar
