અમરેલી, 11 ઓક્ટોબર (હિ.સ.): આજરોજ અમરેલી તાલુકાના અરજણસુખ ગામ ખાતે ₹75 લાખના ખર્ચે તૈયાર થનારા સી.સી. રોડના નિર્માણ કાર્યનું ધારાસભ્ય કૌશિક વેકારિયાના હસ્તે ખાતમુહૂર્ત કરવામાં આવ્યું. ગામના વિકાસ માટે મહત્વપૂર્ણ ગણાતો આ માર્ગ નિર્માણ પ્રોજેક્ટ પૂર્ણ થતાં ગ્રામજનોને સરળ અને સુગમ પરિવહન સુવિધા ઉપલબ્ધ થશે.

કાર્યક્રમ દરમિયાન ધારાસભ્યએ જણાવ્યું કે રાજ્ય સરકાર ગ્રામ્ય વિસ્તારોમાં સુવિધાસભર ઇન્ફ્રાસ્ટ્રક્ચર ઉભું કરવા માટે પ્રતિબદ્ધ છે. તેમણે જણાવ્યું કે ગામોમાં સારા રસ્તાઓથી શિક્ષણ, આરોગ્ય, અને વેપાર ક્ષેત્રે નવી તકો ઊભી થાય છે. તેમણે સ્થાનિક લોકો સાથે સંવાદ કરી જણાવ્યું કે આવનારા સમયમાં ગામના અન્ય વિસ્તારોમાં પણ તબક્કાવાર વિકાસના કામો હાથ ધરવામાં આવશે.

આ પ્રસંગે ગામના સરપંચ, ગ્રામ પંચાયતના સભ્યો, અધિકારીઓ અને ગ્રામજનો મોટી સંખ્યામાં ઉપસ્થિત રહ્યા હતા. ગ્રામજનોએ વિકાસ માટે સતત પ્રયત્નો કરવા બદલ ધારાસભ્યશ્રીએ વ્યક્ત કરેલા સહકાર માટે આભાર વ્યક્ત કર્યો. કાર્યક્રમના અંતે સૌએ મળીને “વિકસિત ગામ – વિકસિત ગુજરાત”ના સંકલ્પ સાથે વિકાસયાત્રા આગળ વધારવાનો સંકલ્પ કર્યો.

---------------

હિન્દુસ્થાન સમાચાર / Gondaliya Abhishek Nandrambhai