અમરેલી, 11 ઓક્ટોબર (હિ.સ.): આજરોજ અમરેલી ખાતે શ્રી ઠક્કરબાપા કુમાર છાત્રાલયમાં વાલી મિટિંગનું આયોજન કરવામાં આવ્યું, જેમાં વિદ્યાર્થીઓના સર્વાંગી વિકાસ, શૈક્ષણિક પ્રગતિ અને ભવિષ્યના માર્ગદર્શન અંગે વિસ્તૃત ચર્ચા કરવામાં આવી. આ પ્રસંગે ધારાસભ્ય કૌશિક વેકારિયા ખાસ ઉપસ્થિત રહ્યા હતા.

વાલીજનો સાથે થયેલા સંવાદ દરમિયાન વિદ્યાર્થીઓના શૈક્ષણિક પરિણામો, દૈનિક શિસ્ત, વર્તણૂક, તેમજ જીવનમૂલ્યોના વિકાસ અંગે મહત્વપૂર્ણ મુદ્દાઓ ઉઠાવવામાં આવ્યા. ધારાસભ્યશ્રીએ જણાવ્યું કે આજના સમયમાં શિક્ષણ માત્ર પુસ્તકી જ્ઞાન પૂરતું ન રહી, પરંતુ તેમાં વ્યક્તિત્વ વિકાસ, નૈતિક મૂલ્યો અને ટેક્નોલોજીકલ કુશળતા પણ આવશ્યક છે. તેમણે વિદ્યાર્થીઓને સંસ્કાર સાથે આગળ વધવા માટે પ્રોત્સાહન આપ્યું.

કાર્યક્રમ દરમિયાન શિક્ષકમંડળ અને સંચાલકો દ્વારા છાત્રાલયની પ્રવૃત્તિઓની વિગતવાર રજૂઆત કરવામાં આવી. વાલીજનો દ્વારા પણ વિદ્યાર્થીઓના ભવિષ્યના માર્ગદર્શન માટે રચનાત્મક સૂચનો આપવામાં આવ્યા. કાર્યક્રમ અંતે ધારાસભ્યશ્રીએ શિક્ષણ ક્ષેત્રે સંસ્થાના પ્રયત્નોની પ્રશંસા કરી અને દરેક વિદ્યાર્થીને “સારા નાગરિક” બનવા માટે પ્રેરિત કર્યા.

---------------

હિન્દુસ્થાન સમાચાર / Gondaliya Abhishek Nandrambhai