સુરત, 31 ઓક્ટોબર (હિ.સ.) : દેશભરમાં ઉજવાયેલા રાષ્ટ્રીય એકતા દિવસના અવસર પર સુરત પોલીસ દ્વારા ‘રન ફોર યુનિટી’નું ભવ્ય આયોજન થયું હતું. હજારો સુરતીઓએ ઉત્સાહપૂર્વક ભાગ લઈને એકતા અને રાષ્ટ્રપ્રેમનો સંદેશ આપ્યો. પરંતુ, કાર્યક્રમ પૂર્ણ થયા પછી રસ્તાઓ પર નાસ્તાના પેકેટ અને પાણીની બોટલોના ઢગલાં જોતા એક અણધારી સ્થિતિ ઊભી થઈ—સ્વચ્છ સુરતની ઓળખ સામે પ્રશ્ન ઊભો થયો.

રન પૂર્ણ થયા બાદ ભાગ લેનારાઓ દ્વારા કચરો રસ્તા પર જ ફેંકી દેતા સમગ્ર વિસ્તાર ગંદકીથી છલકાયો. આ દૃશ્યો જોઈ સુરત પોલીસ કમિશનર અનુપમસિંહ ગેહલોત, જોઈન્ટ પોલીસ કમિશનર બબાંગ જમીર, તથા અન્ય ઉચ્ચ અધિકારીઓએ વિલંબ કર્યા વગર જાતે કચરો ઉઠાવવાની શરૂઆત કરી. અધિકારીઓને રસ્તા પર કચરો વીણતા જોઈ તેમના પત્નીઓ પણ જોડાયા અને મળીને સ્વચ્છતાનું પ્રેરણાદાયી દ્રશ્ય સર્જાયું.

કમિશનર ગેહલોતે જણાવ્યું: “સુરત આપણી ઓળખ છે. તેને સ્વચ્છ રાખવી દરેક નાગરિકની ફરજ છે. સફાઈ માટે ફક્ત કર્મચારીઓની રાહ જોવી યોગ્ય નથી—અમે સૌએ પોતાની જવાબદારી નિભાવવી જોઈએ.”

પોલીસ અધિકારીઓ અને તેમના પરિવારોના આ પગલાએ નાગરિકોમાં સંદેશ આપ્યો કે સ્વચ્છતા માત્ર સરકારી ફરજ નથી, તે સામાજિક સંસ્કાર છે.

---------------

હિન્દુસ્થાન સમાચાર / યજુવેન્દ્ર દુબે