મહેસાણા, 21 નવેમ્બર (હિ.સ.) : વિજાપુર તાલુકામાં માર્ગ સુવિધાઓને વધુ સશક્ત બનાવવાના રાજ્ય સરકારના પ્રયાસો અંતર્ગત મહેસાણા માર્ગ અને મકાન (રાજ્ય) વિભાગ હસ્તકના હાથીપુરા એપ્રોચ રોડ પર રીસરફેસીંગનું મહત્વપૂર્ણ કાર્ય શરૂ કરવામાં આવ્યું છે. લાંબા સમયથી જરૂરી બનેલા આ માર્ગના નવીનીકરણથી સ્થાનિક લોકોના રોજિંદા પરિવહન અનુભવમાં ગુણાત્મક સુધારો થશે. રસ્તાની ઉપલા સપાટી ખરાબ થવાથી વાહન ચાલકોને અસુવિધાનો સામનો કરવો પડી રહ્યો હતો. ખાસ કરીને વરસાદી સિઝનમાં પાણી ભરાવાની સમસ્યા તથા ખાડાઓને કારણે અકસ્માતની શક્યતાઓ પણ વધતી હતી. આ પરિસ્થિતિને ધ્યાને લઈને વિભાગ દ્વારા તાત્કાલિક આયોજન સાથે રીસરફેસીંગ કામગીરીને મંજૂરી આપવામાં આવી છે.

નવી સપાટી તૈયાર થતાં વાહન વ્યવહાર વધુ સરળ, ઝડપી અને સુરક્ષિત બનશે. કૃષિ આધારિત વિસ્તારો માટે આ માર્ગ મહત્વપૂર્ણ હોવાથી ખેડૂતોને તેમની પેદાશોને બજારમાં પહોંચાડવામાં પણ હવે વધુ આરામદાયક સુવિધા મળશે. વિકાસલક્ષી આ કામગીરી આગામી દિવસોમાં પૂર્ણ થવાની સાથે ગ્રામ્ય વિસ્તારના ઈન્ફ્રાસ્ટ્રક્ચરમાં એક વધુ મહત્વપૂર્ણ સુધારો નોંધાવવામાં આવશે. સ્થાનિક રહીશો અને આગેવાનો દ્વારા રાજ્ય સરકાર તથા માર્ગ અને મકાન વિભાગનો આ કામગીરી માટે આભાર વ્યક્ત કરવામાં આવ્યો છે.

---------------

હિન્દુસ્થાન સમાચાર / RINKU AMITKUMAR THAKOR