વડોદરા,5 નવેમ્બર (હિ.સ.) રોજ સવાર પડે અને રાજ્યમાં કસ્માતના બનાવ સામે આવે આજે પણ વડોદરા શહેરના મકરપુરા એરફોર્સ રોડ પર એક મહિલા કાર ચાલકે ટુ-વ્હીલરને ટક્કર મારી હતી. જેમાં બે યુવક ઇજાગ્રસ્ત થયા હતા. આ ટક્કર એટલી ભયાનક હતી કે, ટુ-વ્હીલર ચાલક ફૂટબોલની જેમ હવામાં ફંગોળાયો હતો. બંને યુવાનને સારવાર માટે ખાનગી હોસ્પિટલમાં દાખલ કરવામાં આવ્યા છે. અકસ્માતની આ ઘટનાના CCTV પણ સામે આવ્યા છે. માંજલપુર પોલીસે અકસ્માત કરનાર મહિલાની ધરપકડ કરી આ મામલે વધુ તપાસ શરૂ કરી છે.

વડોદરાના મકરપુરાની યશોદા કોલોનીમાં રહેતા દેશરાજ રામા યાદવ તેમની એકટીવા પર વિરેન્દ્ર ભોલાભાઈ સરોજને લઈને એરફોર્સ રોડ પર કામ અર્થે ગયા હતા. જ્યાંથી તેઓ પરત ફરી રહ્યા હતા, ત્યારે મકરપુરા એરપોર્ટ સ્ટેશનથી માણેજા રોડ પર રોડ ક્રોસ કરી રહ્યા હતા. ત્યારે ટુ-વ્હીલરને મહિલા કાર ચાલકે ટક્કર મારી હતી.

આ ટક્કર એટલી ભયાનક હતી કે, ટુ-વ્હીલર ચાલક ફૂટબોલની જેમ હવામાં ફંગોળાયો હતો. ઘટનાને પગલે આસપાસના લોકોના ટોળેટોળા એકત્ર થઈ ગયા હતા અને મકરપુરા પોલીસને જાણ કરવામાં આવી હતી. અકસ્માતમાં બે વ્યક્તિઓને ગંભીર ઈજા પહોંચતાં તેઓને હોસ્પિટલમાં સારવાર માટે ખસેડાયા છે.

ગંભીર રીતે ઈજાગ્રસ્ત ટુ-વ્હીલર ચાલક દેશરાજ રામા યાદવે જણાવ્યું હતું કે, હું મકરપુરા જીઆઇડીસીમાં કામ કરું છું. કંપનીનો સામાન આપવા માટે બહાર ગયા હતા. ત્યારબાદ એટીએમમાંથી રૂપિયા ઉપાડ્યા હતા. ત્યાંથી નીકળતા જ એક કાર ચાલકે અમારી ટુ-વ્હીલરને ટક્કર મારી હતી. જેથી મને માથા, કમર અને કાનના ભાગે ઈજાઓ થઈ છે. જ્યારે અન્ય ઈજાગ્રસ્ત યુવક વિરેન્દ્ર ભોલા સરોજે જણાવ્યું હતું કે, અમે રોડ ક્રોસ કરી રહ્યા હતા, એ વખતે પૂરપાટ ઝડપે કાર આવી હતી અને અમને ટક્કર મારી હતી. હું એકટીવામાં પાછળ બેઠો હતો. મને માથા, પગ અને કમરના ભાગે ઈજાઓ થઈ છે.

આ મામલે માંજલપુર પોલીસ સ્ટેશનના પીઆઇ એલ.ડી. ગમારાએ જણાવ્યું કે, અકસ્માતની જાણ થતા અમારી ટીમ સ્થળ પર દોડી ગઈ હતી અને કારચાલક મહિલાની ધરપકડ કરીને આ મામલે વધુ તપાસ શરૂ કરી છે.

હિન્દુસ્થાન સમાચાર / હર્ષ શાહ