પર્થ, નવી દિલ્હી, 3 ડિસેમ્બર (હિ.સ.): ઇંગ્લેન્ડ ક્રિકેટ ટીમના ભૂતપૂર્વ બેટિંગ દિગ્ગજ રોબિન સ્મિથનું, પર્થ સ્થિત તેમના ઘરે અચાનક અવસાન થયું. તેઓ 62 વર્ષના હતા. સ્મિથને તેમના વાંકડિયા વાળને કારણે ધ જજ તરીકે ઓળખવામાં આવતા હતા.

સ્મિથે 1988 થી 1996 દરમિયાન ઇંગ્લેન્ડ માટે 62 ટેસ્ટ મેચ રમી હતી, જેમાં 4,236 રન બનાવ્યા હતા. તેમની સરેરાશ 43.67 હતી અને તેમણે નવ ટેસ્ટ સદી ફટકારી હતી. તેમનો સિગ્નેચર શોટ સ્ક્વેર કટ હતો.

તેમણે 71 વનડે પણ રમ્યા હતા અને 1992ના વર્લ્ડ કપ ફાઇનલમાં પહોંચેલી ઇંગ્લેન્ડ ટીમનો ભાગ હતા. 1993માં એજબેસ્ટનમાં ઓસ્ટ્રેલિયા સામે તેમનો અણનમ 167 રન 2016 સુધી ઇંગ્લેન્ડનો વનડે રેકોર્ડ રહ્યો.

પરિવારે ઇંગ્લેન્ડ અને વેલ્સ ક્રિકેટ બોર્ડ (ઈસીબી) દ્વારા એક નિવેદન જારી કરીને જણાવ્યું હતું કે, રોબિનનું 1 ડિસેમ્બર, સોમવારના રોજ દક્ષિણ પર્થના તેમના એપાર્ટમેન્ટમાં અચાનક અવસાન થયું હતું અને મૃત્યુનું કારણ હજુ પણ અજ્ઞાત છે. પરિવારે એ પણ સ્પષ્ટતા કરી હતી કે, તેમના ભૂતકાળના દારૂ અને માનસિક સ્વાસ્થ્ય સંબંધિત સમસ્યાઓના કારણે, તેમના મૃત્યુ વિશે કોઈ અટકળો ન લગાવવી જોઈએ.

બ્રિટિશ માતાપિતાના ઘરે દક્ષિણ આફ્રિકાના ડરબનમાં જન્મેલા રોબિન સ્મિથ પાછળથી તેમના ભાઈ ક્રિસ સ્મિથ સાથે ઇંગ્લેન્ડ આવ્યા હતા. તેમણે 1988માં હેડિંગ્લે ખાતે વેસ્ટ ઇન્ડીઝ સામે ટેસ્ટ ડેબ્યૂ કર્યું હતું. સ્મિથે એશેજ માં બે અને વેસ્ટ ઇન્ડીઝ સામે ત્રણ ટેસ્ટ સદી ફટકારી હતી, જેમાં તેમનો સર્વોચ્ચ સ્કોર 1994માં સેન્ટ જોન્સ ખાતે 175 રન હતો.

નિવૃત્તિ પછી, તેઓ પશ્ચિમ ઓસ્ટ્રેલિયામાં સ્થાયી થયા અને ગયા મહિને પર્થમાં પ્રથમ એશેજ ટેસ્ટમાં હાજર રહ્યા હતા. કોચ એન્ડ્રુ ફ્લિન્ટોફે તેમને ઇંગ્લેન્ડ લાયન્સ ટીમને સંબોધન કરવા માટે આમંત્રણ પણ આપ્યું હતું.

ઈસીબી ના ચેરમેન રિચાર્ડ થોમ્પસને શ્રદ્ધાંજલિ આપતા કહ્યું, રોબિન સ્મિથ એક વિશ્વના સૌથી ઝડપી બોલરો સામે સ્મિત સાથે ઊભા રહે તેવા ખેલાડી હતા, તેમના જુસ્સા અને દૃઢ નિશ્ચયથી અંગ્રેજી ક્રિકેટ ચાહકોને ગૌરવ અને અપાર મનોરંજન મળ્યું.

હિન્દુસ્થાન સમાચાર / સુનિલ દુબે

હિન્દુસ્થાન સમાચાર / ડો.હિતેશ એન.વ્યાસ