રાજકોટ/અમદાવાદ,22 ફેબ્રુઆરી (હિ.સ.) રાજ્ય સરકાર રાજ્યના તમામ નાગરિકોના વિકાસ માટે સતત પ્રયત્નશીલ છે. દરેક જાતિ, સમાજના તમામ અબાલ-વૃદ્ધો, દિવ્યાંગો, છેવાડામાં વસતા વંચિતોનો પણ સર્વાંગી વિકાસ થાય તે માટે મુખ્યમંત્રી ભૂપેન્દ્ર પટેલ સતત તત્પર રહે છે. માત્ર કોઈ એક અંગની ખામીથી પર થઈ ખુમારી અને અનેરા જુસ્સાથી જીવન જીવતા રાજ્યના દિવ્યાંગોના જીવનને વધુ સાનુકૂળ બનાવવા અને સમાજના મુખ્ય પ્રવાહમાં જોડવા માટે રાજય સરકારના માર્ગદર્શન હેઠળ કલેકટર પ્રભવ જોશી દ્વારા રાજકોટ જિલ્લામાં તાલુકા સ્તરે દિવ્યાંગોની તપાસ માટેના કેમ્પ યોજી તેઓને સાધન સહાય અર્પિત કરી દેશના વિકાસમાં જોડવાના પ્રયાસ કરવામાં આવ્યા છે.

જેના ભાગરૂપે રાજકોટ જિલ્લા વહિવટીતંત્ર તથા સંબંધિત વિભાગોના સહયોગથી છેલ્લા 1 વર્ષમાં રાજકોટ જિલ્લામાં તાલુકા વાઇઝ -11 અને શહેર કક્ષાએ-3 મળી કુલ 14 દિવ્યાંગ સાધન સહાય કેમ્પોનું આયોજન કરવામાં આવ્યું હતું. જેમાં કુલ 5011 લાભાર્થીઓએ રજિસ્ટ્રેશન કરાવ્યું હતું. જે અન્વયે સાધન સહાય માટે પાત્રતા ધરાવતા 2494 લાભાર્થીઓને 3 કરોડ 43 લાખ 49 હજાર570 ના ખર્ચે 4314 સાધનો અર્પણ કરવામાં આવ્યા હતા.

આ દિવ્યાંગ સાધન સહાય કેમ્પનો પડધરી ખાતે 207 લાભાર્થીઓએ લાભ લીધો હતો, જેમાંથી 123 લાભાર્થીઓને 17,52,144 ના 254 સાધનો, વિંછીયા ખાતે 287 લાભાર્થીઓએ કેમ્પનો લાભ લીધો હતો, જેમાંથી 214 લાભાર્થીઓને 28,94,444 ના 372 સાધનો, લોધિકા ખાતે 177 લાભાર્થીઓએ કેમ્પનો લાભ લીધો હતો,જેમાંથી 107 લાભાર્થીઓને14,54,814 ના 189 સાધનો આપવામાં આવ્યા હતા. તેમજ જસદણ ખાતે 585 લાભાર્થીઓએ કેમ્પનો લાભ લીધો હતો જેમાંથી 287 લાભાર્થીઓને 48,42,985 ના 498 સાધનો, રાજકોટ ગ્રામ્ય ખાતે 137 લાભાર્થીઓએ કેમ્પનો લાભ લીધો હતો જેમાંથી 57 લાભાર્થીઓને 12,75,253 ના 91 સાધનો અને કોટડાસાંગાણી ખાતે 135 લાભાર્થીઓએ કેમ્પનો લાભ લીધો હતો જેમાંથી 50 લાભાર્થીઓને 10,96,825 ના 95 સાધનો એનાયત કરવામાં આવ્યા હતા.

તમામ કેમ્પ ખાતે એલિમ્કો સંસ્થા દ્વારા દિવ્યાંગોનું એસેસમેન્ટ કરી તેમને જરૂરી સાધન સહાય આપવા માટેની કામગીરી હાથ ધરવામાં આવી હતી. સાથે જ આ કેમ્પમાં દિવ્યાંગોને અસ્થિ વિષયક, ઈ.એન.ટી, મનોદિવ્યાંગતા, આંખની દિવ્યાંગતાના પ્રમાણપત્ર કાઢી આપવામાં આવ્યા હતા. સ્થળ ઉપર જ લોકોને યુ.ડી.આઈ.ડી. કાર્ડ, આવકનો દાખલો, આયુષ્માન ભારત કાર્ડ,

આભા કાર્ડ, આધાર કાર્ડ અને વય પ્રમાણપત્ર કાઢી આપવામાં આવ્યા હતા.

એલીમ્કો દ્વારા તપાસ થયેલા લાભાર્થી દિવ્યાંગોને મોટરાઇઝ ટ્રાઇસિકલ, બ્રેઈલ કીટ, ફોલ્ડિંગ વ્હિલ ચેર, સ્માર્ટફોન,રોલેટર, ક્રચ એલ્બો, વોકિંગ સ્ટિક, કેન, મોબાઇલ ફોન સહિતના સાધનો એનાયત કરવામાં આવ્યાં હતાં.

હિન્દુસ્થાન સમાચાર / હર્ષ શાહ