ગાંધીનગર, 1 જૂન (હિ.સ.) : ઓપરેશન સિંદૂરની સફળતા બાદ દેશભરમાં વધુને વધુ નાગરિકોને નાગરિક સંરક્ષણ વિશે તાલીમબદ્ધ કરવાના ઉદ્દેશ સાથે તા. 31મી મેના રોજ 'ઓપરેશન શીલ્ડ' અંતર્ગત સિવિલ ડિફેન્સ અભ્યાસનું આયોજન કરવામાં આવ્યું હતું.

આ ઓપરેશન શીલ્ડ' અંતર્ગત અમદાવાદના શાહીબાગમાં આવેલા સદર બજાર કેન્ટોનમેન્ટ વિસ્તારમાં સિવિલ ડિફેન્સ મોકડ્રીલ યોજાઈ હતી. આ મોકડ્રીલ દરમિયાન વિવિધ છ પ્રકારની એક્ટિવિટીનો અભ્યાસ કરવામાં આવ્યો હતો. સિવિલ ડિફેન્સ મોકડ્રીલ અંતર્ગત સાઇલેન્ટ રિકોલ અને વોલેન્ટિયર મોબિલાઇઝેશન, એર રેડ સિમ્યુલેશન, કમ્યૂનિકેશન સિસ્ટમ એક્ટિવેશન, બ્લેકઆઉટ પ્રોટોકોલ્સ, બ્લડ ડોનેશન કેમ્પ તથા ઈવેક્યુએશન ડ્રીલ સહિતની એક્સરસાઇઝ પરફોર્મ કરવામાં આવી હતી.

આ મોકડ્રીલ દરમિયાન શરૂઆતમાં હવાઈ હુમલાના સાયરન વાગ્યા હતા. ત્યારબાદ હવાઈ હુમલાની મોકડ્રીલ થઈ અને લોકોને સલામત સ્થળે ખસેડવા માટેની કવાયત હાથ ધરવામાં આવી હતી. એટલું જ નહિ લોકોને સેફ હાઉસમાં લઇ જવામાં આવ્યા હતા અને ઘાયલોને 108 મારફતે નજીકની હોસ્પિટલમાં પહોંચાડવામાં આવ્યા હતા.

અમદાવાદના શાહીબાગ ખાતે આવેલા સદર બજાર કેન્ટોનમેન્ટ વિસ્તારમાં આયોજિત સિવિલ ડિફેન્સ મોકડ્રીલ દરમિયાન રાત્રે 7:45 વાગ્યાથી રાત્રે 8:15 વાગ્યા દરમિયાન બ્લેકઆઉટ પણ કરવામાં આવ્યું હતું.

આ મોકડ્રીલમાં અમદાવાદ અધિક કલેકટર યોગેશ ઠકકર, ડેપ્યુટી કંટ્રોલર સિવિલ ડિફેન્સ અમદાવાદ સિટી દિલીપ ઠાકર, સિવિલ ડિફેન્સના અગ્રણી બાબુભાઈ ઝડફિયા,

આસિસ્ટન્ટ સ્ટેશન કમાન્ડ કેન્ટોનમેન્ટ સિદ્ધાર્થ, અસારવા મામલતદાર જિતેન્દ્ર દેસાઈ, ચીફ વોર્ડન, સિવિલ ડિફેન્સ વિભાગના અઘિકારીઓ, ભારતીય સૈન્ય અધિકારીઓ, કેન્ટોનમેન્ટ સ્ટાફ, તેમજ જવાનો, મહેસૂલ વિભાગના અધિકારીઓ તેમજ કર્મચારીઓ, ફાયર વિભાગની ટીમ, પોલીસ અધિકારીઓ, પોલીસ સ્ટાફ, ટ્રાફિક પોલીસ, નાગરિક સંરક્ષણના અધિકારીઓ તેમજ 300થી વધુ સ્વયંસેવકો, આરોગ્ય વિભાગના અધિકારીઓ તેમજ 10 પેરામેડિકલ સ્ટાફ સાથે 5 એમ્બ્યુલન્સ, એનસીસી કેડેટ્સ, ફાયર વિભાગના અઘિકારીઓ અને સ્ટાફ તેમજ નાગરિકો મોટી સંખ્યામાં જોડાયા હતા.

અત્રે ઉલ્લેખનીય છે કે, ભારત સરકારના ગૃહ મંત્રાલય દ્વારા યુદ્ધ જેવી પરિસ્થિતિમાં હુમલા સામે સ્વબચાવ અને નાગરિક સંરક્ષણની તૈયારીઓને વધારવા માટે દેશની પશ્ચિમી સરહદને અડીને આવેલાં રાજ્યો તેમજ કેન્દ્રશાસિત પ્રદેશોના તમામ જિલ્લાઓમાં નાગરિક સંરક્ષણ કવાયત 'ઓપરેશન શીલ્ડ'નું આયોજન કરવા સૂચના આપવામાં આવી હતી. જે અંતર્ગત અમદાવાદ જિલ્લામાં પણ 'ઓપરેશન શિલ્ડ' અંતર્ગત કલેક્ટર શ્રી સુજીત કુમારના માર્ગદર્શનમાં સિવિલ ડિફેન્સ મોકડ્રીલનું આયોજન કરવામાં આવ્યું હતું.

મોકડ્રીલ એ એક પ્રકારની પ્રેક્ટિસ છે, જેમાં આપણે જોઈએ છીએ કે જો કોઈ કટોકટી જેમ કે, એરસ્ટ્રાઈક અથવા બોમ્બ હુમલો હોય તો સામાન્ય લોકો અને વહીવટી તંત્ર કેટલી ઝડપથી અને કેટલી ઝડપથી પ્રતિક્રિયા આપે છે.

બ્લેકઆઉટ એક્સરસાઈઝ અર્થ એ છે કે નિર્ધારિત સમય માટે આખા વિસ્તારની લાઇટ્સ બંધ કરવી. એનો હેતુ એ બતાવવાનો છે કે જો દુશ્મન દેશ હુમલો કરે તો અંધારપટ થકી આ વિસ્તારને કેવી રીતે સુરક્ષિત રાખી શકાય? આનાથી દુશ્મનને લક્ષ્ય સાધવામાં મુશ્કેલી પડે છે.

હિન્દુસ્થાન સમાચાર / અભિષેક બારડ