નવી દિલ્હી, 18 જૂન (હિ.સ.). વડા પ્રધાન નરેન્દ્ર મોદી અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચે 35 મિનિટની ટેલિફોન વાતચીત થઈ. વડા પ્રધાને સ્પષ્ટ કર્યું કે, ઓપરેશન સિંદૂરમાં અમેરિકાની કોઈ ભૂમિકા નથી અને ભારત પાકિસ્તાન સાથેના દ્વિપક્ષીય મુદ્દાઓ પર કોઈપણ તૃતીય પક્ષની મધ્યસ્થી સ્વીકારશે નહીં.

વિદેશ સચિવ વિક્રમ મિસ્ત્રીએ આજે ​​આ માહિતી આપી. તેમણે જણાવ્યું હતું કે, જી-7 શિખર સંમેલનની બેઠકની બાજુમાં મોદી અને ટ્રમ્પ વચ્ચે મુલાકાતનો પ્રસ્તાવ મૂકવામાં આવ્યો હતો, પરંતુ ટ્રમ્પને અચાનક અમેરિકા પાછા ફરવું પડ્યું. આ પછી, રાષ્ટ્રપતિ ટ્રમ્પની વિનંતી પર આ ફોન વાતચીત થઈ. 22 એપ્રિલના રોજ પહેલગામમાં થયેલા આતંકવાદી હુમલા પછી આ વાતચીત પહેલી વાર થઈ છે, જેમાં ટ્રમ્પે પહેલી વાર ફોન પર શોક વ્યક્ત કર્યો હતો.

વડા પ્રધાન મોદીએ ટ્રમ્પને કહ્યું કે, ભારતે 6-7 મેની રાત્રે ફક્ત આતંકવાદી ઠેકાણાઓ પર મર્યાદિત, ચોક્કસ અને સંતુલિત કાર્યવાહી કરી. તેમણે કહ્યું કે, ભારતનો લશ્કરી પ્રતિભાવ ઉશ્કેરણીજનક નહોતો અને તેનો હેતુ ફક્ત આતંકવાદ પર કડક પ્રહાર કરવાનો હતો. પ્રધાનમંત્રીએ એ પણ માહિતી આપી હતી કે 9 મેના રોજ ઉપરાષ્ટ્રપતિ વાન્સે પાકિસ્તાનના સંભવિત હુમલાની ચેતવણી આપી હતી, જેનો ભારતે અસરકારક અને નિર્ણાયક રીતે જવાબ આપ્યો હતો.

પ્રધાનમંત્રીએ સ્પષ્ટતા કરી હતી કે, આ સમગ્ર ઘટના દરમિયાન, અમેરિકા સાથે કોઈપણ પ્રકારની મધ્યસ્થી કે વેપાર સોદા પર કોઈ ચર્ચા થઈ ન હતી. બંને દેશોના લશ્કરી સંપર્ક માધ્યમો દ્વારા થયેલી લશ્કરી કાર્યવાહી બંધ કરવા માટે પાકિસ્તાને વિનંતી કરી હતી. તેમણે પુનરોચ્ચાર કર્યો કે ભારત ક્યારેય મધ્યસ્થી સ્વીકારતું નથી, અને કરશે પણ નહીં, અને આ અંગે દેશમાં સંપૂર્ણ રાજકીય સર્વસંમતિ છે.

રાષ્ટ્રપતિ ટ્રમ્પે, ભારતના વલણને સમજ્યું અને આતંકવાદ સામેની તેની લડાઈને ટેકો આપ્યો. બંને નેતાઓએ ઇઝરાયલ-ઈરાન સંઘર્ષ, રશિયા-યુક્રેન યુદ્ધ અને હિંદ-પ્રશાંત ક્ષેત્રમાં વ્યૂહાત્મક સહયોગ અંગે પણ ચર્ચા કરી. પ્રધાનમંત્રી મોદીએ, ક્વાડની આગામી બેઠક માટે ટ્રમ્પને ભારત આવવાનું આમંત્રણ આપ્યું હતું, જેનો ટ્રમ્પે સ્વીકાર કર્યો હતો.

રાષ્ટ્રપતિ ટ્રમ્પે પણ, પ્રધાનમંત્રીને કેનેડાથી અમેરિકા આવવાનું આમંત્રણ આપ્યું હતું, જોકે પ્રધાનમંત્રીએ તેમના વ્યસ્ત સમયપત્રકને કારણે પોતાની અસમર્થતા વ્યક્ત કરી હતી. નોંધનીય છે કે, 22 એપ્રિલે પહેલગામમાં થયેલા આતંકવાદી હુમલા બાદ ભારતે ઓપરેશન સિંદૂર શરૂ કર્યું હતું. આ પહેલી વાર છે જ્યારે ભારતે આતંકવાદ સામે કાર્યવાહી કરી છે, તેને પ્રોક્સી વોર ને બદલે સીધું યુદ્ધ માનીને. બીજી તરફ, રાષ્ટ્રપતિ ટ્રમ્પ વિવિધ આંતરરાષ્ટ્રીય મંચો પરથી સતત કહી રહ્યા છે કે, ભારતની કાર્યવાહી રોકવામાં અમેરિકાની ભૂમિકા છે.

હિન્દુસ્થાન સમાચાર / અનૂપ શર્મા / મુકુન્દ

હિન્દુસ્થાન સમાચાર / ડો.હિતેશ એન.વ્યાસ