મુંબઈ, નવી દિલ્હી, 09 જૂન (હિ.સ.). સોમવારે સવારે થાણે જિલ્લામાં કોપર અને દિવા સ્ટેશન વચ્ચે લોકલ ટ્રેનમાંથી પડી જવાથી છ મુસાફરોના મોત થયા. આ અકસ્માતમાં સાત મુસાફરો ઘાયલ થયા છે, જે તમામને કલવાની સરકારી હોસ્પિટલમાં દાખલ કરવામાં આવ્યા છે.

મધ્ય રેલ્વેના મુખ્ય જનસંપર્ક અધિકારી નીલા સ્વપ્રીલે જણાવ્યું હતું કે, આજે સવારે લગભગ 3:30 વાગ્યે, વિરુદ્ધ દિશામાં જતી બે લોકલ ટ્રેનના ફૂટબોર્ડ પર બેઠેલા મુસાફરો એકબીજા સાથે અથડાઈ ગયા અને રેલ્વે ટ્રેક પાસે પડી ગયા. આ ઘટનામાં, કોપર અને દિવા વચ્ચે રેલ્વે ટ્રેક પરથી 8 લોકોને ઉપાડીને હોસ્પિટલ લઈ જવામાં આવ્યા હતા, જ્યારે ગાર્ડે પાંચ ઘાયલ મુસાફરોને GRPને સોંપ્યા હતા. તે બધાની સારવાર કલવા સરકારી હોસ્પિટલમાં ચાલી રહી છે, પરંતુ હોસ્પિટલના સૂત્રોએ હજુ સુધી મૃતકો વિશે માહિતી આપી નથી.

મુંબરા સ્ટેશન માસ્ટરે પત્રકારોને જણાવ્યું હતું કે, રેલ્વે ટ્રેક પર પડી જવાથી ત્રણ લોકોના મોત થયા છે, જ્યારે પાંચ લોકોને હોસ્પિટલમાં લઈ જવામાં આવ્યા છે. હોસ્પિટલના સૂત્રોના જણાવ્યા અનુસાર, આ સમાચાર લખાય છે ત્યાં સુધી, આ ઘટનામાં છ લોકોના મોત થયા છે અને સાત લોકો સારવાર હેઠળ છે.

મુખ્યમંત્રી દેવેન્દ્ર ફડણવીસે, આ ઘટના પર ઊંડો શોક વ્યક્ત કર્યો છે. મુખ્યમંત્રીએ કહ્યું કે, આ ઘટનાની તપાસ રેલ્વે વહીવટીતંત્ર દ્વારા કરવામાં આવશે. આ સમાચાર લખાય છે ત્યાં સુધી, મૃતકોમાં જીઆરપી પોલીસ કર્મચારી વિક્કી બાબાસાહેબ મુખિયાદલની ઓળખ થઈ ગઈ છે, અન્ય પાંચ મૃતકોની ઓળખ કરવાના પ્રયાસો ચાલુ છે.

હિન્દુસ્થાન સમાચાર / રાજબહાદુર યાદવ / અજય વસંત માર્ડીકર / સુનિત નિગમ

હિન્દુસ્થાન સમાચાર / ડો.હિતેશ એન.વ્યાસ