જમ્મુ, નવી દિલ્હી, 03 જુલાઈ (હિ.સ.) કડક સુરક્ષા વચ્ચે, ગુરુવારે દક્ષિણ કાશ્મીરમાં અમરનાથ ગુફા મંદિર માટે જમ્મુ ના ભગવતી નગર બેઝ કેમ્પથી 5,200 થી વધુ યાત્રાળુઓનો બીજો જથ્થો રવાના થયો. 3,880 મીટર ઊંચા મંદિરની 38 દિવસની યાત્રા ગુરુવારે બે માર્ગોથી શરૂ થઈ, અનંતનાગ જિલ્લામાં પરંપરાગત 48 કિમી લાંબો નૂનવાન-પહલગામ માર્ગ અને ગાંદરબલ જિલ્લામાં 14 કિમી ટૂંકા પરંતુ વધુ ઊંચા બાલટાલ માર્ગ. આ યાત્રા 9 ઓગસ્ટના રોજ સમાપ્ત થશે.

અધિકારીઓએ જણાવ્યું હતું કે, સુરક્ષા પોલીસ અને કેન્દ્રીય અર્ધલશ્કરી દળોના રક્ષણ હેઠળ 168 વાહનોના કાફલામાં યાત્રાળુઓ ભગવતી નગર બેઝ કેમ્પથી રવાના થયા હતા. અધિકારીઓએ જણાવ્યું હતું કે, આ સાથે જમ્મુ બેઝ કેમ્પથી મંદિર માટે રવાના થનારા યાત્રાળુઓની સંખ્યા 11,138 થઈ ગઈ છે. યાત્રાળુઓની બીજી ટુકડીમાં 4,074 પુરુષો, 786 મહિલાઓ અને 19 બાળકોનો સમાવેશ થાય છે.

યાત્રાળુઓના એક જૂથે જણાવ્યું હતું કે, 22 એપ્રિલના રોજ પહેલગામમાં થયેલા હુમલાથી તેઓ નિરાશ થયા નથી, જેમાં 26 લોકો માર્યા ગયા હતા. રાયપુરના રહેવાસી હરીશ કુમારે કહ્યું કે, અમે આતંકવાદીઓ કે પાકિસ્તાનથી ડરતા નથી જેમણે નિર્દોષ અને નિઃશસ્ત્ર પ્રવાસીઓ પર હુમલા કર્યા છે. આ એક કાયરતાપૂર્ણ કૃત્ય છે. પહેલગામ જેવી આતંકવાદી ઘટનાઓ દ્વારા ભય પેદા કરીને તેઓ અમને બાબા બર્ફાનીના દર્શન કરતા રોકી શકતા નથી.

તેમની જેમ, કાનપુરથી 20 સભ્યોના જૂથ સાથે અમરનાથ જવા નીકળેલા મુખ્તાર સિંહે કહ્યું કે, તેઓ બિલકુલ ડરતા નથી. તેમણે કહ્યું કે, યાત્રામાં ભાગ લેનારા યાત્રાળુઓની વધતી સંખ્યા આતંકવાદીઓ અને પાકિસ્તાનને યોગ્ય જવાબ આપશે કે અમે તેમનાથી ડરતા નથી.

વાર્ષિક યાત્રા માટે ભગવતી નગર બેઝ કેમ્પમાં અને તેની આસપાસ સુરક્ષા વ્યવસ્થા સક્રિય કરવામાં આવી છે. જમ્મુમાં 34 રહેઠાણ કેન્દ્રો સ્થાપિત કરવામાં આવ્યા છે અને યાત્રાળુઓને રેડિયો ફ્રીક્વન્સી આઇડેન્ટિફિકેશન (આરએફઆઈડી) ટેગ આપવામાં આવી રહ્યા છે. યાત્રા પર જતા યાત્રાળુઓની સ્થળ પર નોંધણી માટે 12 કાઉન્ટર સ્થાપિત કરવામાં આવ્યા છે. અત્યાર સુધીમાં, 3.5 લાખથી વધુ લોકોએ યાત્રા માટે ઓનલાઈન નોંધણી કરાવી છે.

હિન્દુસ્થાન સમાચાર / બલવાન સિંહ / વીરેન્દ્ર સિંહ

હિન્દુસ્થાન સમાચાર / ડો.હિતેશ એન.વ્યાસ