મોડાસા, 22 ઓગસ્ટ (હિ.સ.)અરવલ્લી જિલ્લાના મુખ્યમથક મોડાસા કલેકટર કચેરી ખાતે જિલ્લા કલેકટર પ્રશસ્તિ પારીકની અધ્યક્ષતામાં અને અન્ન અને નાગરીક પૂરવઠા મંત્રી ભીખુસિંહ પરમારની ઉપસ્થિતિમાં જિલ્લા સંકલન અને ફરિયાદ સમિતિની બેઠક મળી હતી.

બેઠકમાં ભિલોડા ધારાસભ્ય પી. સી. બરંડા, બાયડ ધારાસભ્ય ધવલસિંહ ઝાલા દ્વારા રજૂ કરવામાં આવેલા જ્યોતિગ્રામ યોજનાની કામગીરી, રોડ રસ્તા, આરોગ્યલક્ષી કામગીરી, રોગચાળો અટકાવવા કરવામાં આવતી કામગીરી, ટ્રાફિક મેમો , પ્રવાસન સ્થળોના વિકાસ , પ્રધાનમંત્રી આવાસ યોજના, જમીન માપણી અંગેના પ્રશ્નો અંગે ચર્ચા કરવામાં આવી.

બેઠકમાં નિવૃત્ત થતા કર્મચારીઓના પેન્શન, સરકારી લેણાં, કર્મચારીઓને મળતા લાભ, લોક અરજીના નિકાલ અંગે પણ બેઠકમાં ચર્ચા કરવામાં આવી. લોકોની અરજીઓના યોગ્ય નિકાલની પણ ચર્ચા કરાઈ. વહીવટી કામગીરીને ઝડપી અને પરિણામ સભર બનાવવા પણ સૂચન કરાયા.

આ બેઠકમાં જિલ્લા પંચાયત પ્રમુખ પ્રિયંકાબેન ડામોર, ભિલોડા ધારાસભ્ય પી.સી.બરંડા, બાયડ ધારાસભ્ય ધવલસિંહ ઝાલા, જિલ્લા વિકાસ અધિકારી દીપેશ કેડિયા, નિવાસી અધિક કલેક્ટર ડી.વી.મકવાણા સહિત જિલ્લા સંકલન સમિતિના અધિકારીઓ ઉપસ્થિત રહ્યા હતાં.

હિન્દુસ્થાન સમાચાર / મહેન્દ્રપ્રસાદ એચ.પટેલ