પાટણ, 22 ઓગસ્ટ (હિ.સ.)શંખેશ્વર તીર્થ ખાતે પૂજ્ય મુનિ પુણ્યરત્ન મહારાજ સાહેબ અને મુનિ નયશેખર મહારાજ સાહેબની નિશ્રામાં પર્યુષણની આરાધના ચાલી રહી છે. પાર્શ્વચંદ્રસૂરી દાદાવાડી જહાજ મંદિરે એન્કરવાલા ધામ ખાતે યોજાયેલા વ્યાખ્યાનમાં તીર્થંકર પરમાત્માના બે પ્રકારના ધર્મ સમજાવવામાં આવ્યા. સર્વવિરતી ધર્મ એટલે સાધુ જીવન અને દેશવિરતી ધર્મ એટલે શ્રાવક જીવન. શ્રાવકના બાર વ્રતોમાં અગિયારમું વ્રત પૌષધ છે, જે શ્રાવકને સાધુજીવનનો અનુભવ કરાવે છે.

પૌષધના ચાર પ્રકાર છે – આહાર પૌષધ, શરીર સત્કાર પૌષધ, અવ્યાપાર પૌષધ અને બ્રહ્મચર્ય પૌષધ. પર્યુષણના આઠ દિવસ દરમિયાન અનેક ભાવિકો ચોસઠ પ્રહરના પૌષધની આરાધના કરતા રહે છે. આ અવધિ દરમિયાન તેઓ ઉપાશ્રયમાં રહી સાધુ જેવી રીતિ-રિવાજપૂર્ણ જીવનશૈલી અપનાવે છે. શાસ્ત્રો મુજબ એક અહોરાત્રના પૌષધથી ત્રીસ સામાયિકનું ફળ પ્રાપ્ત થાય છે. પર્યુષણ પર્વનું મુખ્ય લક્ષ્ય ક્ષમા છે અને તેને સિદ્ધ કરવામાં પૌષધ વ્રતનું વિશેષ મહત્વ છે.

આઠ દિવસ સુધી ચાલતા આ ધાર્મિક કાર્યક્રમમાં દરરોજ અષાઢીય પાર્શ્વનાથ પ્રભુની આંગીનો શણગાર કરવામાં આવે છે. પાર્શ્વચંદ્રસૂરી એન્કરવાલા ધામ જહાજ મંદિર દ્વારા જીવદયા અને અનુકંપાના કાર્યો પણ સંપન્ન થાય છે. આ શ્રેષ્ઠ આયોજનમાં ગૌતમભાઈ ગડા, ભરતભાઈ ગૌસ્વામી અને રવિભાઈ શર્માએ અનન્ય યોગદાન આપ્યું છે.

હિન્દુસ્થાન સમાચાર / હાર્દિક રાઠોડ