પોરબંદર, 26 ઓગસ્ટ (હિ.સ.): જેસીઆઈ પોરબંદર દ્વારા છેલ્લા અગિયાર વર્ષથી પોરબંદર વિસ્તારના નવોદિત કલાકારોમાં છુપાયેલી સંગીતની કલાને ઉજાગર કરવા અને આ નવોદિત કલાકારોને યોગ્ય સ્ટેજ પૂરું પાડવા વોઇસ ઓફ પોરબંદર સીંગિંગ કોમ્પિટિશન કાર્યક્રમ યોજવામાં આવે છે. આ વર્ષે પણ વોઇસ ઓફ પોરબંદર સિગિંગ કોમ્પિટિશનનું બિરલા હોલ ખાતે સુંદર આયોજન કરવામાં આવ્યું હતું. તેમાં 26 નવોદિત કલાકારોએ પોતાની કલા રજૂ કરી હતી. વોઇસ ઓફ પોરબંદર સિગિંગ કોમ્પિટિશન માટે યોજાયેલ પ્રિસિલેક્શનમાં પોરબંદર જિલ્લાના 100 નવોદિત કલાકારોએ રજીસ્ટ્રેશન કરાવ્યું હતું તેમાંથી ફાઇનલ સ્પર્ધા માટે 26 યુવક યુવતીઓ અને બાળકોની પસંદગી કરવામાં આવી હતી. પ્રિસિલેક્શનમાં પસંદગી પામેલ 26 કલાકારોએ ફાઇનલ સ્પર્ધામાં પોતાની કલા રજૂ કરી હતી જેમાં સિનિયર વિભાગમાં પ્રથમ ક્રમાંકે ધાર્મિક ઢાકેચા, બીજા નંબરે રુદ્ર ઝાલા અને ત્રીજા નંબરે જેનિષ ગાજરા, રાજ મોઢવાડીયા વિજેતા બન્યા હતા.

જુનિયર વિભાગમાં પ્રથમ નંબરે ધાર્મિક મકવાણા, બીજા નંબરે એન્જલ મોઢવાડીયા, ત્રીજા નંબરે પિનલ મારુ વિજેતા જાહેર થયા હતા. આ તમામ વિજેતાઓને સિલ્ડ અને મોમેન્ટો આપી સન્માન કરવામાં આવ્યું હતું. આ સ્પર્ધામાં કુલ 100 કલાકારોએ રજિસ્ટ્રેશન કરાવ્યું હતું તેમાંથી પ્રિસિલેક્શન રાઉન્ડમાં 26 કલાકારોને પસંદ કરવામાં આવ્યા હતા. પસંદગી પામેલા આ સ્પર્ધકોને એક અઠવાડિયા સુધી પ્રખ્યાત કીબોર્ડ આર્ટિસ્ટ કપિલ જોશી, રવિ એરડા અને ડૉ. રાજેશ કોટેચા દ્વારા સુર તાલનું જ્ઞાન ગીતની પસંદગી વગેરે તાલિમ આપવામાં આવી હતી. વોઈસ ઓફ પોરબંદર પ્રોજેકટને સફળ બનાવવા બિરાજ કોટેચાના માર્ગદર્શન હેઠળ જેસીઆઈ પોરબંદરના પ્રમુખ રાધેશ દાસાણી, સેક્રેટરી સમીર ધોયડા, પ્રોજેક્ટ ચેરમેન વિવેક લાખાણી, ધૈવત વિઠ્ઠલાણી, વિશાલ લાખાણી, કેવલ પટેલ અને જેસીઆઈ પોરબંદરના તમામ સભ્યોએ જહેમત ઉઠાવી હતી.વોઇસ ઓફ પોરબંદર સીંગિંગ કોમ્પિટિશન કાર્યક્રમમાં મુખ્ય મહેમાન તરીકે જિલ્લા કલેક્ટર એસ.ડી.ધાનાણી, નિવાસી અધિક કલેકટર જીતેન્દ્ર વદર તથા પોરબંદરની તમામ સામાજિક સંસ્થાઓના હોદ્દેદારો, જ્ઞાતિ સમાજના આગેવાનો સહિતના મહાનુભાવો મોટી સંખ્યામાં ઉપસ્થિત રહ્યા હતા. જિલ્લા કલેક્ટરે જેસીઆઈ પોરબંદરના આ સુંદર આયોજનને બિરદાવી પોરબંદરમાં છુપાયેલી સંગીતની કલાને ઉજાગર કરવા બદલ જેસીઆઈની સમગ્ર ટીમને અભિનંદન આપ્યા હતા.

આ સંગીત સ્પર્ધામાં નિર્ણાયક તરીકે ડો. જયદીપ શાહ, ડેવિન ઓડેદરા અને અમીબેન પઢીયારે સેવા આપી હતી, સમગ્ર કાર્યક્રમનું સંચાલન ડો. રાજેશ કોટેચાએ કર્યું હતું.

---------------

હિન્દુસ્થાન સમાચાર / Tejas Pravinbhai Dholariya