અમરેલી,20 સપ્ટેમ્બર (હિ.સ.): અમરેલી જિલ્લામાં વરસાદી માહોલ પૂરતો અનુકૂળ બન્યા બાદ પણ જિલ્લાનાં મુખ્ય પાંચ ડેમ હજુ છલકાયા નથી. જિલ્લાના કેટલાક ડેમો પૂર ક્ષમતા સુધી ભરાયા હોવા છતાં, મોટા ડેમોમાં પાણીનું પ્રમાણ સંતોષકારક નથી, જેના કારણે આગામી શિયાળામાં પાણી તંગી ઉભી થવાની આશંકા વધી રહી છે.

જિલ્લાનાં ડેમોમાં હાલની સ્થિતિ મુજબ, ઢેબી ડેમમાં માત્ર 33.66 ટકા, વડી ડેમમાં 59.31 ટકા, છેલ દેદુમલ ડેમમાં 67.9 ટકા અને મુંજીયાસર ડેમમાં માત્ર 41.49 ટકા જ પાણી ભરાયું છે. ખાસ કરીને છેલ દેદુમલ ડેમમાં સૌથી ઓછું પાણી સંગ્રહ નોંધાયું છે. આ ડેમમાં ફક્ત 5.24 MCUM જેટલું જ પાણી સંગ્રહિત છે. વડીયા ડેમમાં 5.3657 MCUM પાણી છે જ્યારે વડી ડેમમાં 8.016 MCUM પાણીનો જથ્થો ઉપલબ્ધ છે.

બીજી તરફ, જિલ્લાનાં કેટલાક નાના અને મધ્યમ કદના ડેમો પૂર ક્ષમતા સુધી ભરાઈ ગયા છે. ખોડીયાર ડેમ, સાતરવડી ડેમ, વડીયા ડેમ, સુરજવડી ડેમ અને ધાધરવાળી બે ડેમ હાલમાં 100 ટકા ક્ષમતા સુધી છલકાયા છે. આ ડેમોમાં ભરેલા પાણીથી આસપાસના વિસ્તારનાં ગામોને હળવો રાહત અનુભવાયો છે.

તેથી પણ હકીકત એ છે કે મોટા ડેમો પૂરતા ભરાયા વગર જિલ્લામાં લાંબા ગાળે પાણીની જરૂરિયાત પૂરી પાડવી મુશ્કેલ બનશે. અમરેલી જિલ્લામાં પીવાનું પાણી, કૃષિ સિંચાઈ તેમજ પશુપાલન માટે મોટાભાગે ડેમના જળસંગ્રહ પર આધાર રાખવામાં આવે છે. આવનારા દિવસોમાં જો વધુ વરસાદ ન પડે તો ગામડાંઓમાં પીવાના પાણીની તંગી સાથે સિંચાઈ પર પણ ગંભીર અસર પડી શકે છે.

જિલ્લાનાં ખેડૂતો પહેલેથી જ વરસાદની અનિશ્ચિતતા કારણે મુશ્કેલીમાં મુકાયા છે. ખેડૂતોની મુખ્ય પાક મગફળી માટે પૂરતું સિંચાઈ પાણી ઉપલબ્ધ ન રહે તો પાક ઉત્પાદન ઘટવાની દહેશત છે. પશુપાલકો માટે પણ આવનારો શિયાળો કપરું સાબિત થઈ શકે છે. કારણ કે ચારો ઊગાડવા અને પશુઓ માટે પાણીની સુવિધા ઉપલબ્ધ કરાવવા પૂરતો જળસંગ્રહ જરૂરી છે.

વરસાદી માહોલ હજી ચાલુ હોવાથી, જો સપ્ટેમ્બર માસના અંત સુધીમાં સારો વરસાદ થાય તો હાલ અડધા ભરાયેલા ડેમો પણ છલકાઈ શકે છે. પરંતુ હાલમાં જે સ્થિતિ છે તે પ્રમાણે અમરેલી જિલ્લાની પાણી પરિસ્થિતિ ચિંતાજનક છે.

---------------

હિન્દુસ્થાન સમાચાર / Gondaliya Abhishek Nandrambhai