નવી દિલ્હી, 11 ઓક્ટોબર (હિ.સ.). રેવન્યુ ઇન્ટેલિજન્સ ડિરેક્ટોરેટ (ડીઆરઆઈ) એ, પૂર્વ ભારતમાં બાંગ્લાદેશમાંથી થતી સોનાની દાણચોરી સાથે સંકળાયેલા નેટવર્ક વિરુદ્ધ મોટી કાર્યવાહી કરી છે. ડીઆરઆઈએ વિશેષ અભિયાન ચલાવીને 7.8 કિલોગ્રામથી વધુ વિદેશી મૂળનું સોનું જપ્ત કર્યું છે, જેની બજાર કિંમત 11.50 કરોડ રૂપિયાથી વધુ છે. આ મામલે છ લોકોની ધરપકડ કરવામાં આવી છે.

નાણા મંત્રાલયે રવિવારે જારી કરેલા નિવેદનમાં જણાવ્યું કે, ડીઆરઆઈએ પૂર્વ ભારતમાં ગુપ્ત માહિતીના આધારે અનેક ઓપરેશન ચલાવીને લગભગ 7.8 કિલોગ્રામ વિદેશી સોનું જપ્ત કર્યું છે, જેની કિંમત 11.5 કરોડ રૂપિયાથી વધુ છે. આ દરમિયાન બાંગ્લાદેશ સરહદ સાથે સંકળાયેલા દાણચોરીના રસ્તાઓનો પતો ચાલ્યો, જ્યારે દાણચોરી સિન્ડિકેટના કથિત સરગના સહિત છ લોકોની ધરપકડ કરવામાં આવી છે.

મંત્રાલય મુજબ, એક ઓપરેશનમાં ડીઆરઆઈ અધિકારીઓએ પશ્ચિમ બંગાળના ડંકુની ટોલ પ્લાઝા પર એક ચાર પૈડાવાળા વાહનને રોક્યું. તેમાં ચાર લોકો સવાર હતા, જેઓ બાંગ્લાદેશ સરહદ નજીક આવેલા શહેર બનપુરથી કોલકાતા જઈ રહ્યા હતા. વાહન અને તેમાં સવાર લોકોની તલાશી દરમિયાન, અધિકારીઓને લગભગ 6.8 કિલોગ્રામ વજનની 50 સોનાની લગડીઓ (ગોલ્ડ બાર) મળી, જેની કિંમત લગભગ 10 કરોડ રૂપિયા હતી. તેમાં કેટલીક સોનાની લગડીઓ પર વિદેશી નિશાન હતા.

ડીઆરઆઈ અધિકારીઓ અનુસાર, વાહનમાં સવાર લોકો આ કિંમતી ધાતુના કાયદેસર કબજાને સાબિત કરતા કોઈ દસ્તાવેજો રજૂ કરી શક્યા નહીં. પૂછપરછ દરમિયાન, આરોપીઓએ કથિત રીતે બાંગ્લાદેશના રસ્તે ભારતમાં વિદેશી સોનાની દાણચોરીમાં પોતાની સંડોવણી સ્વીકારી. ડીઆરઆઈએ કહ્યું કે, ધરપકડ કરાયેલા લોકોમાંથી એક બનપુર સરહદીય વિસ્તારમાં સક્રિય દાણચોરી સિન્ડિકેટનો કથિત સરગના હતો.

તે જ દિવસે ચલાવવામાં આવેલા અલગ-અલગ ઓપરેશનમાં ડીઆરઆઈની ટીમોએ પશ્ચિમ બંગાળના માલદા ટાઉન રેલવે સ્ટેશન અને ન્યૂ જલપાઈગુડી રેલવે સ્ટેશન પર ટ્રેન યાત્રીઓને રોક્યા. તલાશી દરમિયાન લગભગ 1 કિલોગ્રામ વિદેશી સોનું જપ્ત કરવામાં આવ્યું, જેની કિંમત લગભગ 1.5 કરોડ રૂપિયા હતી.

નાણા મંત્રાલયે કહ્યું કે, ડીઆરઆઈની તપાસમાં જાણવા મળ્યું કે, જપ્ત કરાયેલું સોનું, જે બંગડીઓ અને સોનાની લગડીઓના રૂપમાં હતું, ત્રિપુરામાં ભારત-બાંગ્લાદેશ સરહદ પાર દાણચોરી કરીને લાવવામાં આવેલા સોનામાંથી બનાવવામાં આવ્યું હતું.

આ અભિયાનોથી બાંગ્લાદેશને અડીને આવેલા સરહદીય વિસ્તારોની સાથે-સાથે પૂર્વોત્તરને કોલકાતા જેવા મુખ્ય બજારો સાથે જોડતા માર્ગ અને રેલ માર્ગોનો ઉપયોગ દાણચોરીના સોનાની અવરજવર માટે ચાલુ રહેવાનો સંકેત મળે છે. ડીઆરઆઈ ગુપ્ત માહિતી આધારિત અમલીકરણ અને સંકલિત કાર્યવાહી દ્વારા સંગઠિત દાણચોરી નેટવર્કનો ખાત્મો કરવા પ્રતિબદ્ધ છે.

હિન્દુસ્થાન સમાચાર / પ્રજેશ શંકર / સંજીવ પાશ

હિન્દુસ્થાન સમાચાર / માધવી વ્યાસ