રાજકોટ, 15 ઓક્ટોબર (હિ.સ.) : પશ્ચિમ રેલવેના રાજકોટ રેલવે ડિવિઝને સ્ક્રેપ (નકામા સામાન) નિકાલ ક્ષેત્રે નવો કીર્તિમાન સ્થાપિત કર્યો છે. 13 ઑક્ટોબર 2026ના રોજ યોજાયેલી એક જ હરાજીમાં ડિવિઝને ₹7.09 કરોડના સ્ક્રેપનું રેકોર્ડબ્રેક વેચાણ કર્યું છે. રાજકોટ ડિવિઝનના ઇતિહાસમાં આ કોઈપણ એક હરાજી દરમિયાન થયેલું અત્યાર સુધીનું સૌથી વધુ સ્ક્રેપ વેચાણ નોંધાયું છે.

આ સફળતા સાથે રાજકોટ ડિવિઝને ચાલુ નાણાકીય વર્ષ 2026–27માં અત્યાર સુધીમાં કુલ ₹22.65 કરોડનું સંચયી (કુલ) સ્ક્રેપ વેચાણ પ્રાપ્ત કર્યું છે, જે આ સમયગાળામાં ડિવિઝનનું સર્વોચ્ચ સ્તર છે. આ મોટી સિદ્ધિ ડિવિઝનની અસરકારક મટિરિયલ મેનેજમેન્ટ સિસ્ટમ, પારદર્શક ઈ-હરાજી પ્રક્રિયા અને રેલવેના સંસાધનોના ઉત્તમ ઉપયોગ પ્રત્યેની પ્રતિબદ્ધતા દર્શાવે છે.

આ નોંધપાત્ર સફળતા મેળવવામાં રાજકોટ ડિવિઝનના સ્ટોર વિભાગના અધિકારીઓ અને કર્મચારીઓના સંકલિત પ્રયાસો મુખ્ય રહ્યા છે. નિર્ધારિત પ્રક્રિયાઓ અનુસાર સ્ક્રેપનો નિકાલ કરીને બિનઉપયોગી અને વધારાની સામગ્રીનું મહત્તમ આર્થિક મૂલ્ય મેળવવામાં ડિવિઝનને સફળતા મળી છે.

રેલવેના સંચાલન, જાળવણી અને વિકાસ કાર્યો દરમિયાન એકત્ર થતી બિનઉપયોગી સામગ્રીનો સમયસર નિકાલ કરવાથી વધારાની આવક થાય છે. આ સિવાય સ્ક્રેપના રિસાયક્લિંગને પ્રોત્સાહન મળવાની સાથે રેલવે પરિસરોને સ્વચ્છ અને વ્યવસ્થિત રાખવામાં પણ મોટી મદદ મળે છે. ડિવિઝન ભવિષ્યમાં પણ સંપૂર્ણ પારદર્શિતા અને બહેતર કાર્યપ્રણાલી દ્વારા રેલવેની આવકમાં વધારો કરવા માટે પ્રતિબદ્ધ છે.

---------------

હિન્દુસ્થાન સમાચાર / Dhaval Nilesh bhai bhatt