નવી દિલ્હી, 16 ઓક્ટોબર (હિ.સ.). કેન્દ્રીય ગૃહમંત્રી અમિત શાહે. પંજાબમાં નશાના કારોબાર, ગેંગસ્ટરવાદ અને સંગઠિત અપરાધના વધતા ખતરાને લઈને શુક્રવારે ભગવંત માન સરકાર પર નિશાન સાધ્યું અને રાજ્યમાં કાયદો અને વ્યવસ્થાની સ્થિતિ પર સવાલો ઉઠાવ્યા.

શાહે સોશિયલ મીડિયા પ્લેટફોર્મ X પરની પોસ્ટમાં જણાવ્યું કે, પંજાબ આજે નશા, ગેંગસ્ટરવાદ અને સંગઠિત અપરાધના વધતા ખતરા સામે ઝઝૂમી રહ્યું છે. તેમણે સવાલ કર્યો કે, માન સરકાર સામે સૌથી મોટો પડકાર એ છે કે આખરે પંજાબની જનતાની સુરક્ષાની જવાબદારી કોણ નિભાવશે.

ગૃહમંત્રીએ દિરબામાં એક પિતા દ્વારા દબાણમાં ઝેર ખાઈ લેવાની અને માનસામાં નશા વિરુદ્ધ અવાજ ઉઠાવનાર પરવિંદર સિંહ ઝોટાની દિવસ-દહાડે થયેલી હત્યાની ઘટનાઓનો ઉલ્લેખ કરતા જણાવ્યું કે, આ ઘટનાઓએ પંજાબની કાયદો અને વ્યવસ્થા પર ગંભીર સવાલો ઉભા કર્યા છે. તેમણે દાવો કર્યો કે, પરવિંદરના પિતાએ આમ આદમી પાર્ટી (આઆપા) સરકાર અને તેના ધારાસભ્ય પર ગંભીર આરોપો લગાવ્યા છે. શાહે કહ્યું કે, ગૃહ મંત્રાલય પણ આ બંને ઘટનાઓ પર પંજાબ સરકાર પાસેથી જવાબ માંગશે.

તેમણે કહ્યું કે, રાજ્યમાં નશાનો કારોબાર ફૂલીફાલી રહ્યો છે, સંગઠિત અપરાધનો ખતરો વધી રહ્યો છે અને નશા વિરુદ્ધ અવાજ ઉઠાવનારાઓની સુરક્ષા પર સવાલો ઉભા થઈ રહ્યા છે.

શાહે મુખ્યમંત્રી ભગવંત માનને કહ્યું કે, પંજાબની જનતાને પ્રચાર નહીં, જવાબ અને ઘોષણાઓ નહીં, પરંતુ પરિણામ જોઈએ છે. તેમણે નશાના નેટવર્ક પર નિર્ણાયક કાર્યવાહી કરવા અને અપરાધીઓને મળતા કોઈપણ રાજકીય સંરક્ષણની નિષ્પક્ષ તપાસની માંગ કરી.

ગૃહમંત્રીએ પંજાબમાં ભાજપની સરકાર બનવા પર રાજ્યને નશામુક્ત, ગેંગસ્ટરમુક્ત અને સુરક્ષિત બનાવવાનો સંકલ્પ દોહરાવ્યો. તેમણે કહ્યું કે, તેમની પાર્ટીનો લક્ષ્ય નશાના કારોબાર પર પ્રહાર કરવો, યુવાનોના ભવિષ્યનું રક્ષણ કરવું, અપરાધીઓ વિરુદ્ધ કડક કાર્યવાહી કરવી અને કાયદાનું એવું રાજ સ્થાપિત કરવું છે, જેમાં કોઈ પણ નાગરિક ભયના ઓથાર હેઠળ જીવવા મજબૂર ન થાય.

હિન્દુસ્થાન સમાચાર / સુશીલ કુમાર / પવન કુમાર / અનૂપ શર્મા

હિન્દુસ્થાન સમાચાર / ડો.હિતેશ એન.વ્યાસ