અદન (યમન), નવી દિલ્હી, 29 ઓક્ટોબર (હિ.સ.). મધ્ય પૂર્વના દેશ યમનના મુખ્ય બંદર શહેર અદન આંતરરાષ્ટ્રીય હવાઈમથક પર, ઈરાન સમર્થિત આતંકવાદી જૂથ હુતીના બે મિસાઈલ હુમલાઓથી વિમાનન સુરક્ષા અંગે ચિંતા ઊભી થઈ છે. અદન હવાઈમથક પર મિસાઈલ હુમલાઓથી હવાઈ ટ્રાફિક ખોરવાઈ ગયો છે. માનવીય સહાયતાના મહત્વપૂર્ણ પ્રવેશદ્વાર તરીકે કાર્ય કરતા આ હવાઈમથક પરના હુમલાઓમાં સામાન્ય નાગરિકો ઘાયલ થયા છે અને સંપત્તિને નુકસાન થયું છે.

ગલ્ફ ન્યૂઝ, અરબ ન્યૂઝ અને અલ જઝીરાના અહેવાલ મુજબ, યમનના સૈન્ય પ્રવક્તા અને પરિવહન મંત્રાલય મુજબ, બુધવારે બે બેલિસ્ટિક મિસાઈલોએ અદન આંતરરાષ્ટ્રીય હવાઈમથકને નિશાન બનાવ્યું હતું. આ હુમલાઓમાં સામાન્ય નાગરિકો ઘાયલ થયા. સંપત્તિને નુકસાન થયું અને હવાઈ ટ્રાફિક થોડા સમય માટે અટકી ગયો. આ પહેલા 7 ઓક્ટોબરના રોજ પણ બેલિસ્ટિક મિસાઈલો અને ડ્રોન દ્વારા હુમલો કરવામાં આવ્યો હતો.

એવું જણાવવામાં આવ્યું છે કે, હુતીએ યમનની આંતરરાષ્ટ્રીય સ્તરે માન્યતા પ્રાપ્ત સરકારના ગઢમાં આવેલા આ હવાઈમથકને ખાલી કરવાની માંગ કરી છે. યમનના પરિવહન મંત્રાલયે આ હુમલાઓની નિંદા કરી છે. મંત્રાલયે ચેતવણી આપી છે કે આ હુમલાઓ સામાન્ય નાગરિકોના જીવ અને હવાઈ સંચાલન (ઉડાન સુરક્ષા) માટે ખતરો છે. એવી પણ ખબર છે કે, ઓક્ટોબરમાં નાગરિક હવાઈમથકો પરના હુમલાઓ પછી સાઉદીના નેતૃત્વ હેઠળની સેનાએ હુતીના 82 ઠેકાણાઓનો નાશ કર્યો.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ