કચ્છ, 03 ઓક્ટોબર (હિ.સ.) : રાપર તાલુકાના ઘાણીથર ગામની સીમમાં બનેલી ફાયરિંગની ગંભીર ઘટનાને પગલે પોલીસે હાથ ધરેલી ઝડપી તપાસમાં ગણતરીના કલાકોમાં ચાર શખ્સોને ઝડપી પાડી કાર્યવાહી હાથ ધરી છે. ગાગોદર અને આડેસર પોલીસની સંયુક્ત કામગીરીથી સમગ્ર ઘટનાનો પર્દાફાશ થયો હોવાનું પોલીસ દ્વારા જણાવાયું છે. આરોપીઓ પાસેથી એક બંદૂક અને ત્રણ છરી સહિતનો મુદ્દામાલ કબજે કરવામાં આવ્યો છે.

ઘાણીથર ગામની સીમમાં ફાયરિંગની ઘટના બનતા પોલીસ તંત્ર દોડતું થયું હતું. બનાવની ગંભીરતાને ધ્યાનમાં રાખીને ગાગોદર પોલીસ સ્ટેશનના પોલીસ ઇન્સ્પેક્ટર જી.એ. સોલંકી અને આડેસર પોલીસ સ્ટેશનના પોલીસ ઇન્સ્પેક્ટર જે.બી. આચાર્યના માર્ગદર્શન હેઠળ બંને પોલીસ ટીમોએ તપાસનો ધમધમાટ શરૂ કર્યો હતો. ઘટનામાં સંડોવાયેલા શખ્સોને શોધવા માટે પોલીસ દ્વારા વિવિધ દિશામાં તપાસ હાથ ધરવામાં આવી હતી.

દરમિયાન પોલીસને મળેલી ખાનગી બાતમીના આધારે તપાસ આગળ વધારવામાં આવી હતી. માનવ સ્ત્રોત મારફતે મળેલી ચોક્કસ માહિતીના આધારે પોલીસે સંભવિત આરોપીઓ અંગે વિગતો એકત્ર કરી કાર્યવાહી કરી હતી. પોલીસ ટીમે ઝડપી કાર્યવાહી કરીને અલ્તાફ દિનમામદ હિંગોળજા (ઉંમર 21, રહે. આડેસર), મુબારક મામદ હિંગોળજા (ઉંમર 27, હાલે ટગા, મૂળ વિજાપર), હનિફ લતીફ નારેજા (ઉંમર 32, રહે. સણવા) અને નજરમામદ ઇસ્માઈલ હિંગોળજા (ઉંમર 45, રહે. ટગા)ને ઝડપી પાડ્યા હતા.

પોલીસે આરોપીઓ પાસેથી એક બંદૂક કિંમત રૂ. 5 હજાર તથા ત્રણ છરી કબજે કરી હોવાનું જાણવા મળ્યું છે. કબજે કરાયેલા મુદ્દામાલની કુલ કિંમત રૂ. 5 હજાર દર્શાવવામાં આવી છે. ફાયરિંગના આ બનાવને પગલે ગાગોદર પોલીસ સ્ટેશનમાં ગુનો નોંધવામાં આવ્યો છે.

પોલીસ દ્વારા આરોપીઓ વિરુદ્ધ કાયદેસરની કાર્યવાહી હાથ ધરવામાં આવી છે. બનાવ પાછળનું ચોક્કસ કારણ, ફાયરિંગમાં હથિયારનો ઉપયોગ કેવી રીતે થયો અને અન્ય કોઈ વ્યક્તિની સંડોવણી છે કે કેમ તે સહિતની વિગતો અંગે વધુ તપાસ ચાલી રહી છે. આ સમગ્ર કાર્યવાહી વરિષ્ઠ પોલીસ અધિકારીઓના માર્ગદર્શન હેઠળ ગાગોદર તથા આડેસર પોલીસની ટીમ દ્વારા કરવામાં આવી હતી.

---------------

હિન્દુસ્થાન સમાચાર / Rohit Ramjibhai Padhiyar