નવી દિલ્હી, 05 ઓક્ટોબર (હિ.સ.). દિલ્હીમાં બળાત્કારની ઘટનાઓ પર સ્વતઃ સંજ્ઞાન કેસની સુનાવણી કરતા સર્વોચ્ચ અદાલતે મહિલાઓ વિરુદ્ધના ગુનાઓને રોકવા માટે કડક ઉપાયોની જરૂરિયાત પર ભાર મૂક્યો છે. ન્યાયમૂર્તિ જે.બી. પારડીવાલાની અધ્યક્ષતાવાળી બેન્ચે કહ્યું કે, અધિકારીઓએ એવું વાતાવરણ બનાવવું જોઈએ, જેમાં મહિલાઓ રસ્તાઓ પર ચાલતી વખતે અથવા સાર્વજનિક પરિવહનથી મુસાફરી કરતી વખતે સુરક્ષિત અનુભવે.

અદાલતે કહ્યું કે, જ્યાં સુધી તમે ગુનેગારોના મનમાં એવો ડર પેદા નહીં કરો કે, જો અમે આવું કંઈક કર્યું તો માર્યા જઈશું, ત્યાં સુધી તમે આવા ગુનાઓને રોકી નહીં શકો. સુનાવણી દરમિયાન સોલિસિટર જનરલ તુષાર મહેતાએ કહ્યું કે, સરકાર અદાલતની ભાવનાઓ સાથે સંપૂર્ણપણે સહમત છે અને સંબંધિત પ્રાધિકરણો અને એજન્સીઓને આ અંગે જાણ કરશે. દિલ્હી પોલીસ, દિલ્હી સરકાર, દિલ્હી નગર નિગમ અને મહિલા અને બાળ વિકાસ વિભાગ તથા અન્ય સંબંધિત પક્ષો સોગંદનામું દાખલ કરશે. તેમણે વિનંતી કરી કે, સંબંધિત વિભાગોના સોગંદનામા અને એમિકસ ક્યુરીનો અહેવાલ આવ્યા પછી જ અદાલત સુનાવણી કરે.

આ પહેલા 28 સપ્ટેમ્બરના રોજ સુનાવણી દરમિયાન અદાલતે કહ્યું હતું કે, કાલકાજીની ઘટનાથી 2012ના નિર્ભયા કાંડની યાદો તાજી થાય છે અને આ કાયદાનું પાલન કરાવતી એજન્સીઓની નિષ્ફળતા છે. વહીવટી નિષ્ફળતાઓ અને સુરક્ષામાં ગંભીર બેદરકારીને કારણે સાર્વજનિક સ્થળોને જોખમી ક્ષેત્ર બનવા દેવામાં આવી શકે નહીં.

હિન્દુસ્થાન સમાચાર /સંજય / વીરેન્દ્ર સિંહ / પવન કુમાર

હિન્દુસ્થાન સમાચાર / ડો.હિતેશ એન.વ્યાસ