
નવી દિલ્હી, 18 નવેમ્બર. દિલ્હીની રાઉઝ એવન્યુ અદાલતે, આજે 1980માં મતદાર યાદીમાં કોંગ્રેસ નેતા સોનિયા ગાંધીનું કથિત રીતે નામ નોંધાવવા બદલ, પ્રથમ માહિતી અહેવાલ (એફઆઈઆર) દાખલ કરવાની માંગ પર સુનાવણી કરતા દિલ્હી પોલીસ પાસે કાર્યવાહીનો અહેવાલ માંગ્યો છે. અધિક મુખ્ય ન્યાયિક મેજિસ્ટ્રેટ વિનોદ જોશીએ આ મામલાની આગામી સુનાવણી 28 નવેમ્બરે કરવાનો આદેશ આપ્યો છે.
આજે ફરિયાદકર્તા અને વકીલ વિકાસ ત્રિપાઠીએ 1980, 1981 અને 1983ની પ્રમાણિત મતદાર યાદીઓની નકલો જમા કરાવી. આ પહેલા અદાલતે 6 નવેમ્બરે ફરિયાદકર્તાને વધારાના દસ્તાવેજો રજૂ કરવાની પરવાનગી આપી હતી. અદાલત આ મામલાની નવેસરથી સુનાવણી કરી રહી છે. આ પહેલા 21 સપ્ટેમ્બરે વિશેષ ન્યાયાધીશ વિશાલ ગોગનેએ મામલો મેજિસ્ટ્રેટને પરત મોકલતા કહ્યું હતું કે આના પર ફરીથી વિચાર કરો અને તર્કસંગત આદેશ પસાર કરો.
વિશેષ ન્યાયાધીશ વિશાલ ગોગનેએ કહ્યું હતું કે, મેજિસ્ટ્રેટ અદાલતનો આદેશ તર્કસંગત નથી. મેજિસ્ટ્રેટ અદાલતના આદેશને વકીલ વિકાસ ત્રિપાઠીએ સત્ર અદાલતમાં પડકાર્યો હતો. આ પહેલા 11 સપ્ટેમ્બરે અધિક મુખ્ય ન્યાયિક મેજિસ્ટ્રેટ વૈભવ ચૌરસિયાએ અરજી ફગાવી દીધી હતી. અરજીમાં કહેવામાં આવ્યું હતું કે મતદાર યાદીમાં સોનિયા ગાંધીનું નામ 1980માં જ જોડાઈ ગયું હતું જ્યારે તેઓ 1983માં ભારતના નાગરિક બન્યા હતા.
અરજીમાં કહેવામાં આવ્યું હતું કે, વચ્ચે સોનિયા ગાંધીનું નામ મતદાર યાદીમાંથી 1982માં હટાવવામાં આવ્યું હતું અને બાદમાં 1983માં ફરી નામ જોડવામાં આવ્યું હતું. અરજીમાં કહેવામાં આવ્યું હતું કે, સોનિયા ગાંધીએ ભારતીય નાગરિકતા માટેની અરજી પણ એપ્રિલ 1983માં આપી હતી. અરજીમાં કહેવામાં આવ્યું હતું કે, જ્યારે સોનિયા ગાંધી 1983માં ભારતીય નાગરિક બન્યા તો 1980માં મતદાર યાદીમાં નામ જોડવા માટે કેટલાક નકલી દસ્તાવેજો આપવામાં આવ્યા હશે, જે એક ગંભીર ગુનો છે. એવામાં અદાલત સોનિયા ગાંધી વિરુદ્ધ પ્રથમ માહિતી અહેવાલ દાખલ કરવાનો આદેશ આપે. મેજિસ્ટ્રેટ અદાલતે આ મામલે ન તો સોનિયા ગાંધીને નોટિસ પાઠવી હતી અને ન તો દિલ્હી પોલીસને.
હિન્દુસ્થાન સમાચાર / સંજય કુમા / મુકુંદ
હિન્દુસ્થાન સમાચાર / ડો.હિતેશ એન.વ્યાસ