
અમરેલી, 21 નવેમ્બર (હિ.સ.) : અમરેલી તાલુકાના રંગપુર ગામે સ્વામિનારાયણ યુવક મંડળ દ્વારા સખી સ્નેહમિલન સમારોહ અંતર્ગત ‘ચાલ સખી પિયર’ કાર્યક્રમનું આયોજન કરવામાં આવ્યું હતું. આ કાર્યક્રમમાં રાજ્ય મંત્રી કૌશિકભાઈ વેકરિયા ઉપસ્થિત રહ્યા હતા અને બહેનો સાથે આનંદભર્યા પ્રસંગમાં સહભાગી બન્યા હતા.
કાર્યક્રમ દરમિયાન મોટી સંખ્યામાં બહેનો ઉપસ્થિત રહી હતી. સખી સ્નેહમિલનના આ આયોજનમાં બહેનોને પિયર જેવો પ્રેમ, હૂંફ અને આત્મીયતાનો અનુભવ કરાવવાનો પ્રયાસ કરવામાં આવ્યો હતો. આ પ્રસંગે મંત્રી કૌશિકભાઈ વેકરિયાએ ઉપસ્થિત બહેનો સાથે સંવાદ કરી કાર્યક્રમની ખુશીમાં સહભાગી બન્યા હતા.
આવા સામાજિક અને સાંસ્કૃતિક આયોજનો સમાજમાં પરસ્પર સ્નેહ, ભાઈચારો અને પારિવારિક સંબંધોને વધુ મજબૂત બનાવવામાં મહત્વપૂર્ણ ભૂમિકા ભજવે છે. ખાસ કરીને બહેનો માટે યોજાતા આવા સ્નેહમિલન કાર્યક્રમો તેમને એકબીજા સાથે જોડાવાની અને આનંદની પળો માણવાની તક પૂરી પાડે છે.
રંગપુર ખાતે યોજાયેલા આ કાર્યક્રમમાં સામાજિક એકતા, આત્મીયતા અને પારિવારિક હૂંફનો સુંદર માહોલ જોવા મળ્યો હતો.
---------------
હિન્દુસ્થાન સમાચાર / Gondaliya Abhishek Nandrambhai