બોટાદ, 22 ફેબ્રુઆરી (હિ.સ.)હોળાયા ગામે રાજ્ય સરકાર દ્વારા ચલાવવામાં આવતો જન સેવા રથ પહોંચતા ગ્રામજનોમાં ઉત્સાહનો માહોલ જોવા મળ્યો હતો. આ રથનો મુખ્ય હેતુ ગ્રામિણ ગરીબ, ખેડૂતો અને જરૂરિયાતમંદ નાગરિકોને સરકારની વિવિધ કલ્યાણકારી યોજનાઓનો લાભ તેમની વાટ પર જ પહોંચાડવાનો છે.કાર્યક્રમ દરમિયાન ગ્રામજનોને ચણાની નોંધણી, આયુષ્માન કાર્ડ, પેન્શન યોજનાઓ, રેશન કાર્ડ સંબંધિત સેવાઓ સહિત વિવિધ સરકારી યોજનાઓ અંગે વિસ્તૃત માર્ગદર્શન આપવામાં આવ્યું હતું. સંબંધિત વિભાગના અધિકારીઓ અને કર્મચારીઓ દ્વારા યોજનાઓની પાત્રતા, જરૂરી દસ્તાવેજો અને અરજી પ્રક્રિયા અંગે સરળ ભાષામાં સમજણ અપાઈ હતી.ખાસ કરીને ખેડૂતો માટે પાક સંબંધિત નોંધણી, સહાય યોજનાઓ અને આરોગ્ય સુરક્ષા યોજના અંતર્ગત આયુષ્માન કાર્ડ બનાવવાની સુવિધા સ્થળ પર જ ઉપલબ્ધ કરાવવામાં આવી હતી.
જેના કારણે ઘણા ગ્રામજનોએ તરત જ જરૂરી દસ્તાવેજો સાથે નોંધણી પ્રક્રિયા પૂર્ણ કરી લાભ મેળવ્યો હતો.જન સેવા રથની વિશેષતા એ છે કે લોકોને હવે સરકારી કચેરીઓમાં ધક્કા ખાવા પડતા નથી. ગામડામાં જ વિવિધ વિભાગોની સંયુક્ત સેવા ઉપલબ્ધ થવાથી સમય અને ખર્ચ બન્નેમાં બચત થાય છે. વડીલો, મહિલાઓ અને દૈનિક મજૂરી કરતા લોકોને ખાસ રાહત અનુભવાઈ હતી.ગ્રામજનો દ્વારા આ પહેલનું સ્વાગત કરવામાં આવ્યું હતું. અનેક લોકોએ જણાવ્યું હતું કે આવી સેવા નિયમિત રીતે ગામ સુધી પહોંચે તો વધુ લોકો સરકારની યોજનાઓનો લાભ લઈ શકશે.જન સેવા રથનો આ પ્રયાસ ગ્રામિણ વિસ્તારોમાં લોકકલ્યાણ અને પારદર્શક સેવા વ્યવસ્થાની દિશામાં એક મહત્વપૂર્ણ પગલું સાબિત થઈ રહ્યો છે. સરકારની યોજનાઓનો લાભ છેલ્લે વ્યક્તિ સુધી પહોંચે તે હેતુથી શરૂ કરાયેલ આ અભિયાન ગામડાંઓમાં સકારાત્મક પરિવર્તન લાવી રહ્યું છે.
---------------
હિન્દુસ્થાન સમાચાર / GONDALIYA DISHANT
