મહેસાણા, 22 ફેબ્રુઆરી (હિ.સ.)
મહેસાણા જિલ્લામાં અનોખું અને પ્રેરણાદાયક દ્રશ્ય જોવા મળ્યું, જ્યાં બિહારના બે યુવાનો શેખ તજમ્મુલ અને શેખ મુંઝાહિર તિરંગો સાથે 20 રાજ્યોની સ્કેટિંગ યાત્રા પર નીકળ્યા છે. તેમની આ યાત્રાનો મુખ્ય ઉદ્દેશ્ય દેશની પ્રખ્યાત દરગાહોની ઝિયારત કરવાની સાથે કોમી એકતા અને ભાઈચારાનો સંદેશ ફેલાવવાનો છે.
માત્ર ધોરણ 8 સુધી અભ્યાસ કરનાર આ યુવાનો ખિસ્સામાં માત્ર 3 હજારથી 4 હજાર રૂપિયા લઈને આ સાહસિક યાત્રા પર નીકળ્યા છે. તેઓ દરરોજ સ્કેટિંગ દ્વારા 50 થી 90 કિમી સુધીનું અંતર કાપે છે. તેમની પીઠ પર 8 થી 15 કિલો વજનની બેગમાં જરૂરી કપડાં અને જીવન જરૂરિયાતની વસ્તુઓ સાથે રાખે છે.
આ યાત્રા પૂર્ણ કરવામાં તેમને આશરે 8 થી 9 મહિનાનો સમય લાગશે. રાત્રિ દરમિયાન તેઓ પેટ્રોલ પંપ, દરગાહ અથવા અન્ય સુરક્ષિત સ્થળોએ રોકાણ કરે છે. હાઇવે પર તિરંગો સાથે સ્કેટિંગ કરતા આ યુવાનો લોકોમાં આકર્ષણનું કેન્દ્ર બન્યા છે.તેમની આ યાત્રા દેશપ્રેમ, હિંમત અને સંકલ્પનું પ્રતિક બની આજના યુવાનો માટે પ્રેરણાસ્ત્રોત સાબિત થઈ રહી છે.
---------------
હિન્દુસ્થાન સમાચાર / RINKU AMITKUMAR THAKOR
