તેલ અવીવ, નવી દિલ્હી, 18 માર્ચ (હિ.સ.). ઈરાનના ભૂતપૂર્વ ટોચના સુરક્ષા અધિકારી ડૉ. અલી લારીજાનીના મૃત્યુ બાદ, ઈસ્લામિક રિવોલ્યુશનરી ગાર્ડ કોર્પ્સ (આઈઆરજીસી) એ ઈઝરાયલ સામે કડક કાર્યવાહી કરી છે. આઈઆરજીસી એ ઈઝરાયલની રાજધાની, તેલ અવીવમાં 100 થી વધુ સ્થળો પર હુમલો કર્યો છે. ડૉ. લારીજાની યુએસ-ઈઝરાયલ સંકલિત લશ્કરી કાર્યવાહીમાં માર્યા ગયા હતા. આજે અમેરિકા-ઈઝરાયલ-ઈરાન યુદ્ધનો 19મો દિવસ છે.

ઈરાનના પ્રેસ ટીવી અનુસાર, આ માહિતી આઈઆરજીસી ના નિવેદનમાં આપવામાં આવી હતી. આઈઆરજીસી એ કહ્યું કે, તેણે અમેરિકા-ઈઝરાયલી આક્રમણના જવાબમાં તેના ઓપરેશન ટ્રુ પ્રોમિસ 4 ના 61મા તબક્કા દરમિયાન આ સ્થળો પર હુમલો કર્યો. નિવેદનમાં કહેવામાં આવ્યું છે કે, મલ્ટી-વોરહેડ ખુરમશહર-4 અને કાદર મિસાઈલો, તેમજ ઈમાદ અને ખૈબર શિકાન પ્રોજેક્ટાઈલ્સનો ઉપયોગ દુશ્મનના સ્થળોને નિશાન બનાવવા માટે કરવામાં આવ્યો હતો. આ હુમલો ઈરાનની સુપ્રીમ નેશનલ સિક્યુરિટી કાઉન્સિલના ભૂતપૂર્વ સેક્રેટરી ડૉ. લારીજાનીની હત્યાનો બદલો લેવા માટે કરવામાં આવ્યો હતો.

પ્રેસ ટીવી અનુસાર, આ હુમલામાં ઈઝરાયલની સૌથી અદ્યતન હવાઈ સંરક્ષણ પ્રણાલીનો નાશ થયો હતો, જેના પરિણામે તેલ અવીવમાં આંશિક બ્લેકઆઉટ થઈ ગયું હતું. આના કારણે ઈઝરાયલી સેના માટે પરિસ્થિતિને નિયંત્રિત કરવી અને અસરગ્રસ્ત લોકોને બચાવવાનું મુશ્કેલ બન્યું હતું. દરમિયાન, કોર્પ્સે અહેવાલ આપ્યો છે કે ઓપરેશન ટ્રુ પ્રોમિસ 4 દરમિયાન અત્યાર સુધીમાં 230 થી વધુ ઈઝરાયલીઓ માર્યા ગયા છે.

આઈઆરજીસી અનુસાર, તેલ અવીવ ઉપરાંત, પવિત્ર શહેર અલ-કુડ્સ, હાઈફા, બીયર શેવા બંદર અને નેગેવ રણમાં સંવેદનશીલ અને વ્યૂહાત્મક સ્થળોને પણ નિશાન બનાવવામાં આવ્યા હતા. વધુમાં, કતાર, બહેરીન, સંયુક્ત આરબ અમીરાત, કુવૈત અને સાઉદી અરેબિયામાં અમેરિકી બેઝ પર હુમલો કરવામાં આવ્યો હતો.

ઈઝરાયલની રાષ્ટ્રીય કટોકટી તબીબી, આપત્તિ રાહત, એમ્બ્યુલન્સ અને બ્લડ બેંક સેવા, મેગેન ડેવિડ એડોમ (એમડીએ) એ અહેવાલ આપ્યો હતો કે, મધ્ય ઈઝરાયલમાં ઈરાની બેલિસ્ટિક મિસાઈલ હુમલામાં બે લોકો માર્યા ગયા હતા. તેમાંથી એક મહિલા હતી. બંને રામત ગાન શહેરમાં લોહીલુહાણ હાલતમાં મળી આવ્યા હતા. તેલ અવીવની ઉત્તરે આવેલા બ્નેઈ બ્રાક શહેરમાં પણ મિસાઈલના ટુકડા પડ્યા હતા. સીએનએનના અહેવાલ મુજબ, એક વ્યક્તિને સામાન્ય ઈજા થઈ હતી.

ઇઝરાયલ સંરક્ષણ દળોએ એક્સ પર પોસ્ટ કર્યું, હોમ ફ્રન્ટ કમાન્ડ ટીમો દેશના મધ્ય ભાગમાં એવા સ્થળોએ તાત્કાલિક પહોંચી ગઈ છે, જ્યાં મિસાઈલ પડ્યા હોવાના અહેવાલો છે. હોમ ફ્રન્ટ કમાન્ડ બચાવ અને રાહત ટીમો કામ કરી રહી છે. હોમ ફ્રન્ટ કમાન્ડે રહેવાસીઓને સલાહ આપી હતી કે તેઓ હવે સલામત સ્થળો (આશ્રયસ્થાનો) પર સ્થળાંતર કરી શકે છે.

દરમિયાન, આઈડીએફ એ લેબનાનમાં હિઝબુલ્લાહ રોકેટ લોન્ચર્સ અને લડવૈયાઓને લક્ષ્ય બનાવીને હવાઈ હુમલાઓનો ધમધમાટ શરૂ કર્યો છે. આઈડીએફ એ મંગળવારે જણાવ્યું હતું કે, આ તેના ઓપરેશન રોરિંગ લાયન નો ભાગ છે. દરમિયાન, યુદ્ધ વિભાગે એક્સ પર એક પોસ્ટ શેર કરી, જેમાં લખ્યું હતું કે, અમે રાષ્ટ્રપતિ ટ્રમ્પના આદેશોને અત્યંત ઝડપ અને ચોકસાઈથી અમલમાં મૂકી રહ્યા છીએ. ઓપરેશન 'એપિક ફ્યુરી' એ ઈરાની સૈન્યને સંપૂર્ણપણે નાશ કરી દીધું છે.

અમેરિકી નેવી એડમિરલ અને કમાન્ડર બ્રેડ કૂપરે એક વિડિયોમાં કહ્યું, અમે અમારા લશ્કરી ઉદ્દેશ્યો પર સંપૂર્ણપણે ધ્યાન કેન્દ્રિત કરી રહ્યા છીએ. અમારું લક્ષ્ય ઈરાનની બેલિસ્ટિક મિસાઈલો, ડ્રોન અને નૌકાદળના જોખમોને દૂર કરવાનું છે. આજ સુધી, અમારા વાયુસેના, નૌકાદળ અને મરીન કોર્પ્સના વિમાનચાલકોએ સંયુક્ત રીતે 6,000 થી વધુ લડાયક ઉડાન ભરી છે. અમેરિકાએ હોર્મુઝ સ્ટ્રેટ નજીક ઈરાની કિનારે સ્થિત મજબૂત ઈરાની મિસાઈલ બેઝ ને નિશાન બનાવ્યું છે.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ